Diwali bomb ajanga linük nung mopung menenba level aika tuogo

New Delhi, November 12 (Agencies): Linük tesem balala ajaklen Diwali benjung mapang kaket bomb apokba ajanga mopung nung ‘particulate matter (PM)’ tali küma mela aliba limit dang nungi 5-6 ben agi tali tuogo.

Yimti 10 nungi Central Pollution Control Board-i agütsüba National Air Quality Index ajanga ashiba agi, Muzaffarpur, Lucknow, Faridabad, Kanpur aser Agra ama yimtitem nung PM 2.5 ji 200 nungi 500 tashi lir.

Mopung quality ji Lucknow aser Muzaffarpur na nung kangasa majung, Agra, Kanpur, Pune, Patna aser Faridabad nung kanga majung aser Hyderabad o Chandrapur na nunga majung ta record süogo.

Ketdangsertemi mepishiaka Diwali benjung mapang Delhi nung fireworks aser bomb tanen makai apokba sülen Delhi nunga mopung quality level ji ‘kangasa majung’ kümogo aser Delhi tesem kar nungbo 20 ben agi tamajungba kümogo.

Mopung quality level kangasa majungba ajanga anema alirtema kongshir aser tashitak balala keta alirtembo kanga mejungi kongshir. Mopung level ‘kanga majung’ ajanga tangu sashiba dak sentakba shirang dendaktsür.

“Kaket agi yangluba bomb nungi adokba toxic mokozü ajanga mopung nung aliba ‘particles’ tamajungba kümdaktsür. Ibaji ajangasa asenok aliba tesem nung chemical tamajung bendener aser anogo aika alir,” ta Centre for Science & Environment ajanga metetdaktsü.

Parnokisa, 2010 küm nungi tenzüka Diwali mapang mopung menenba level ji tenetben nungi tiben agia tamajungba kümogo.

“Iba ya ajanga tangu sashiba timtem alirtem aser temelungjang timtem alirtem dang masü saka anema alirtema kongshir,” ta CSE-isa ashi.