Djokovic, Federer, Halep Cincinnati semifinals-i iogo

Luroi/August 18, 2018 (Agencies): Rogonü quarter final asaya nung Novak Djokovic-i junga masayatetba tejashi nung racket ka raksar külen ang Milos Raonic madak 7-5, 4-6, 6-3 agi takok ngua semifinal tongtetogo. Pa semifinal nung Marin Cilic den asayatsü shibai 7-6 (7), 6-4 agi Pablo Carreno Busta koka liasü.
Djokovic-i Cincinnati final ponguben tashi tonga asayaogo, saka khen danga takok ngua mali. Pa ATP Masters 1000 championships tekuprongla akoker asaya mezüngbuba akümtsü meranger.
“Ni iba ajanga idaki aru. Kü dak tajungshiba ka lir aser ni semifinal tongteta jenjang tajung ka nung lir,” ta pai ashi.
Racket raksaba dak sendakba nung pai ashiba agi, “Ni racket raksaba atema mepelar kechiyong tanurtemi ni reprangdar ta meteta lir aser iba atema ni nema madanger, saka khen khenbo tezüdang ulura alir aser aji toktsütsü nüngdaker,” ta paisa ashi.
Kasa mapang nung Federer-i iba asayamung tenetben tashi koka lir, koba asayartem ajak rongnungi timba asütsü. Taoba küm ana iba asayamung nung shilem magiba sülen taküm pai külem asayar Stan Wawrinka 6-7 (2), 7-6 (6), 6-2 agi koka semifinal tongtetogo.
Federer semifinal nung David Goffin den asayatsü shibai Juan Martin del Potro 7-6 (5), 7-6 (4) agi kokogo.
Anogo ishika tzünglu atonga aruba ajanga tebur quarterfinals asaya trok aser tetsür asaya asem tashi Yangtep masayateti atsülangtsüsa aküm.
Kasa asayamung tetsür kija asaya ka nung Simona Halep 7-5, 6-4 agi Ashleigh Barty madak takok ngua asayar ghonda ishika sülen tanaben Lesia Tsurenko 6-4, 6-1 koka semifinal tongtetogo.
Halep-i taoba küm aser 2015 küm iba asayamung final tonga asayaogo saka anaben prongla la tamakok ngua liasü. La semifinal nung Aryna Sabalenka den asayatsü shibai Madison Keys koka liasü.
Ano tanga asaya ka nung Petra Kvitova 7-5, 5-7, 6-3 agi Elise Mertens koka Kiki Bertens den semifinal asayatsü jangjaogo, shibai Anett Kontaveit tsükdaktsü.