Djokovic-i 4 buba Rogers Cup takok marok agizükogo

Toronto, August 01 (Agencies): Alima ajunga nung World No. 1, Novak Djokovic-i final asaya koka, 4 buba Rogers Cup takok marok yashi, Deobar nü agizükogo.
Serbia nunger Djokovic-i yashi points 6-3, 7-5 ngua, Japan nunger Kei Nishikori final asaya nung tsükdaktsü.
2007, 2011 aser 2012 densema, Djokovic-i taoba mapanga Canada kübok Toronto aser Montreal na nung melentepa asayaba hardcourt tennis asayamong indang takok marok 3 ben tashi agizüka lir.
Arishi küm 29 tain Djokovic-i taküm, 2016 küm tenzüker tanü tashi nung ajak agi takok marok 7 tashi agizüka lir aser Grand Slam takok marok 12 densema, tennis asayatsü tenzüker tanü tashi nung ajak agi takok marok 66 agizükba osang jangjaogo.
Tan takok anguba ya Djokovic-i Nishikori den 12 ben tashi ajurutepa asayadang asaya 10 buba akoker lir.
Ano külen, tan takok marok agizükba sülen Djokovic-i Brazil kübok Rio de Janeiro nung tan August ita asayatsü ayongba 2016 Rio Olympics nung takok ngua shilem agitsü alizüng ayuba olen ka metetdaktsüogo.
“Saisapongtsü sabang nung Olympics ya sabang tongtiba lir anungji, Olympics nung shilem agitsü temeten angubaji maongka tulu angur lir. Taoba mapang, Beijing aser London na nung takok ngua shilem agiba ama, tan Rio nunga ni takok ngua shilem agitsü alizüng yua lir,” ta Djokovic-i metetdaktsü.
Djokovic-i Beijing Olympics nung bronze medal agizük saka London nungbo Argentina nunger Juan Martin Del Potro mekokteti bronze medal magizüktettsa jenjang tamajung ajurua liasü.