Djokovic-i 5 buba Indian Wells takok marok agizükogo

Indian Wells, March 21 (Agencies): Serbia nunger Novak Djokovic-i Canada nunger Milos Raonic madak final asaya koka Indian Wells tennis asayamong takok marok yashi, Deobar aonung agizükogo.
Tebur World No. 1, Djokovic-i yasüng minute 77 nung points 6-2, 6-0 ngua Raonic final asaya nung ayong ayonga tsükdaktsü.
Arishi küm 28 tain Djokovic-i tan agi Indian Wells takok marok 3 buba tashi atonga aser ajak agi Indian Wells takok marok 5 buba agizüker lir.
2013 nungi tenzüka tanü tashi nung Indian Wells asayamong nung ken danga tamakok majurusang, Djokovic-i tennis asayatsü tenzüker tanü tashi nung takok marok 62 buba agizükogo.
Pai tan agi ATP & WTA hardcourt asayamong indang takok maroka 17 buba agizüker lir.
Ano külen, Belarus tsür, Victoria Azarenka-ia America tsür, Serena Williams madak final asaya koka tetsür singles takok marok agizükba osang jangjaogo.
Tetsür World No. 15, Azarenka-i yasüng ace 5 tashi yanglua minute 88 nung points 6-4, 6-4 ngua tetsür World No. 1, Serena final asaya nung tsükdaktsü.
Azarenka-i tan agi Indian Wells takok marok tanabuba aser tennis asayatsü tenzüker tanü tashi nung singles takok marok 19 buba agizüker lir.
Azarenka-i tan final akokba sülen takok marok den senpet sen dollar sen million 1.02 agizükba den külemi, 2014 sülen tan mezüngsüa tetsür asayar Top 10 tarensen nung densemtsü jenjang ngua tetsür World No. 8 akümba osang jangjaogo.