Djokovic-i Ausatralian Open nung takok marok nguogo

Melbourne, January 31 (Agencies): Deobarnü Melbourne Park nung tan Australian Open asaya tatembangba asayadang Serbia nunger World No 1, Novak Djokovic-i 6-1, 7-5, 7-6(3) agi Britain nunger Andy Murray madak takok nguogo.
Djokovic-i tan takok anguba ajanga Roy Emerson den saku küma iba asayamung marok trokben buba abener.
Taoba mapang takok ngur alisang, Djokovic aser Murray na tsüngda iba asaya ya gondha 2 ser minute 53 nung tembang.
Murray ya tan agi Australian Open final asaya pongu buba nung tamakok angur aser Djokovic-i den final asaya nung pezüben tashi tamakok angurba lir.
Serbia nungi world number one-i tan agi Grand Slam 11 benogo aser iba takok ya ajanga Australia nunger Rod Laver o Sweden nunger Bjorn Borg na den saku kümogo.
“Rod Laver nunger den saku küma tenüng tetshitsüsa mapangi bentsür aruba atema ni tejak tenteter. Na taonung arua iba asaya akhüm ketdakja reprangba asoshi kanga pelar,” ta Djokovic-i ashi.
“Roy Emerson taonung yagi maliaka, pa ama asayar tajung ka den saku küma nia Australian Open marok trokben ngutetba ya ni asoshi tajangzük tulu lir, ta Djokovic-isa ashi.