Djokovic-i Federer akok; Sania & Martina nati doubles takok angu

London, July 12 (Agencies): Deobarnü tebur single asaya final nung taoba mapang Wibledon champion Novak Djokovic-i ghonda asem tsüngda nung 7-6 (7/1), 6-7 (10/12), 6-4, 6-3 agi Roger Federer madak takok anguba ajanga tan agi Wimbledon marok asemben buba benogo.
Federer-i tan tamakok anguba ajanga joko küm asembuba takok tulu ka danga monguteter ka kümogo.
Taoba mapangtem memesük, Federer-i tanü asaya nung aiben zükpetba ajanga pai makoktsüsa aküm.
Ano, Honibar nü Sania Mirza den külem ser tan Wimbledon nung takok anguba ya Martina Hingis atema 1998 nungi tang tashi nung mezüng Wimbledon takok marok angur asütsü.
Arishi küm 34 tain, Hingis aser arishi küm 24 tain, Mirza nati 5-7, 7-6 (7/4), 7-5 nguteta Russia tsür Ekaterina Makarova aser Elena Vesnina na madak takok angu.
Tena taküm March ita nungi külem ser asayatsü tenzükba sülen tan ya tena asoshi mezüngbuba Grand Slam akokerba lir.
Hingis-i 1996 küm Helena Sukova na külemser asayadang iba marok ya mezüng aben aser 1998 küma Jana Novotna den külem ser asayadang tanabenbuba aben. Aji dang masü saka 1997 küm tetsür single asaya nunga lai Wimbledon marok ya khen bena lir.
Ajisüaka tetsür o tebur meyokteper asayaba nung takok asemben tashi ngua liaka tan akokba ya Mirza atemabo mezüngbuba Grand Slam takok lir.
Asaya temer külen-i Mirza-i tena pusemer ajak dang pelaba metetdakja liasü.
Ano, tetsür aser tebur temeyoktep asaya nung India nunger Leander Paes o Martina Hingis nati takok angu.