Djokovic-i Laureus Sportsman of the Year sempet agizükogo

Berlin, April 19 (Agencies): Tebur tennis World No. 1, Novak Djokovic-i Laureus Sportsman of the Year sempet yashi, Hombar nü agizükogo.
Yashi Germany yimtiba, Berlin nung sentong tajung ka agia Djokovic-i iba nungtugu sempetji agizüka liasü.
Serbia nunger Djokovic-i Barcelona football asayar mongin, Lionel Messi; alima nung tekaratiba asemsang, Usain Bolt aser Formula 1 champion, Lewis Hamilton nunger den temaba jenjang ngua yashi sempetji agizük.
Ano, America tsür, Serena Williams-ia nungtugu football asayar, Carli Lloyd aser Jamaica’er tetsür toktepa asemer, Shelly-Ann Fraser-Pryce na den temaba jenjang ngua, Sportswoman of the Year sempet agizükba osang jangjaogo.
Djokovic aser Serena naprongi yaküm, 2015 küm asayaba Grand Slam asayamong 4 nungi Grand Slam takok marok 3 tashi agizüka kanga junga shilem agiba nüngtem nem tena nem iba nungtugu sempetji agüja liasü.
Serena-i 2003 aser 2010 küm aser Djokovic-i 2012 aser 2015 küm agizükba densema, tenapronglai iba nungtugu sempet ya tan agi tasembenbuba agizüker lir.
Ano, 2015 US Masters aser US Open asayamong takok angur golf asayar, Jordan Spieth-i Breakthrough of the Year sempet aser cricket World Cup takok marok agizüker, New Zealand teloki Team of the Year sempet agizüka liasü.
Germany nunger triathlete, Jan Frodeno-ia Action Sportsperson of the Year sempet agizüka par Gemany nem konang bener arutsüba osang jangjaogo.
Taoba March ita cancer tashidak agi shiranga asüsang, Netherlands nunger football asayar aser coach, asür Johan Cruyff tenüng nung par jabaso, Jordi-i Spirit of Sport sempet agizüka liasü.