Djokovic-i ‘Paris Masters’ final kokogo

Paris, November 08 (Agencies): Serbia nunger, arishi küm 28 tain, World No.1 Novak Djokovic-i ‘Paris Masters’ tennis asayamung nung 6-2, 6-4 agi Andy Murray koka tan agi iba marok pezüben buba benogo. Tan takok anguba ya dena pai match 22 atonga-atonga akoker asütsü aser küm ka nung Master’s title trok tashi anguba otsü tasen yangluogo.
Arishi küm 28 tain, Murray-i kanga zükpetba ajanga point aika lalua liasü. Taküm tena tsüngta tenet ben asayaba nung Djokovic-i trokben kokogo.
Tang tashi nung tena tsüngta match 30 asayaba nung Murray-i 21 ben tashi Djokovic makok.
October ita Shanghai open nung tena semi-final asayadang Djokovic-i 6-1 6-3 agi Murray madak takok ngua liasü anungji kodang junga asadangdir Murray-i tan tajungba asayaogo.
“Ibai ni asoshi jenjang tasen ka atongba amai lir,” ta tan mezüng Paris Masters Final atongsang, Murray-i ashi.
Pai, “Taruba küm tajungba asayatsü merangtsü,” ta shisem.
Murray-i, “Novak den pai takok anguba tepela lemsatep. Pa mezüng jenjang angutsü kangsa temsüa lir. Nia sangküm takok angutsü imlar,” ta ashi.