Djokovic-i tongti Grand Slam takok marok 10 buba agizüker

New York, September 14 (Agencies): Serbia nunger Novak Djokovic-i Switzerland nunger tennis asayar mongin, Roger Federer madak final asaya koka US Open 2015 asayamong tebur singles shilem indang takok marok yashi Deobar nü agizükogo.

Tebur World No. 1, Djokovic-i yashi points 6-4 5-7 6-4 6-4 agi Federer madak takok anguba sülen taküm 2015 küm ayonga asayaba Grand Slam asayamong 4 rong nung 3 buba takok marok agizüker aküm.

Arishi küm 28 tain Djokovic-i tan agizükba ya pai tennis asayatsü tenzüker tanü tashi nung tongti takok marok 10 buba aser US Open takok marok 2 buba agizüker lir.

Djokovic-i tanü tashi nung US Open final asayatsü jenjang 5 ben tashi ngua lir saka 2011 küm agizükba densema pai takok marokbo tan agi 2 buba agizüktsü maongka angur lir.

“Ni taoba hopta 2 tashi tennis kanga dang temulungsüa asayaogo aser iba yongji ni tan tamakok ajuruba atema mesasar. Djokovic ama champion ka den asayatsüji kanga dang jangratemtsü lir,” ta arishi küm 34 tain Federer-i metetdaktsü.

Federer-i 2012 küm takok marok agizüka Grand Slam takok marok 17 agizüker akümba sülenbo tanü tashi Grand Slam takok marok agizüktsü maongka ken danga ngua mali.

Djokovic aser Federer nati tan agi 42 benbuba ajurutepa toktepa asayaba sülen tenapronglai asaya 21-21 koka tang kasa jenjang nung lir.