Djokovic o Serena na Australian Open final-i iogo

Melbourne, January 28 (Agencies): Defending champions, Novak Djokovic aser Serena Williams nati par semifinal asaya nung takok ngua tang tasayadak Australian Open final asayatsü jenjang tanü, Brehostibar nü nguogo.
Serbia nunger Djokovic-i tanü ghonda 2 ser minute 19 nung points 6-1 6-2 3-6 6-3 ngua Switzerland nunger Roger Federer tebur singles semifinal asaya nung tsükdaktsü.
Tebur World No. 1, Djokovic-i küm 6 nung tan agi 5 ben tashi Australian Open final nung shilem agitsü jenjang angur lir.
Arishi küm 28 tain Djokovic-i Britain nunger Andy Murray mesüra Canada nunger Milos Raonic na rong nung ka den tan Deobar nü final asayatsü.
America tsür, Serena-ia tanü minute 64 nung points 6-0, 6-4 ngua Poland tsür, Agnieszka Radwanska tetsür singles semifinal asaya nung ayong ayonga tsükdatsü.
Tanü takok anguba sülen tetsür World No. 1, Serena-i Germany tsür, Angelique Kerber den final asayatsü.
Kerber-ia tanü points 7-5 6-2 ngua Britain tsür, Johanna Konta tanabuba semifinal asaya nung tsükdaktsü.
Arishi küm 34 tain Serena-i tan final asayaji kokra, la 22 buba Grand Slam takok marok agizüker küma Germany tsür, Steffi Graf-i taoba mapang yangluba otsü meneper akümtsü.
Ano külen, India tsür, Sania Mirza aser Croatia nunger Ivan Dodig nati India nunger Leander Paes aser Switzerland tsür, Martina Hingis na tsükdaktsüba sülen mixed doubles semifinal-i iogo.
Mirza o Dodig nati tanü points 7-6, 6-3 ngua defending champions, Paes o Hingis na madak takok angu.