Djokovic o Serena nati 2015 ITF Player of the Year sempet agizükogo

London, December 22 (Agencies): International Tennis Federation (ITF)-i tebur aser tetsür na shilem indang 2015 Player of the Year sempet Novak Djokovic aser Serena Williams na nem tanü Mongolbar nü agütsüogo.
Taküm 2015 küm ayongba Australian, Wimbledon aser US Open takok marok agizükba den külemi, French Open nunga Stan Wawrinka sülen anidaka tanabuba takok marok ngua, Serbia nunger Djokovic-i taküm agi 4 ben buba asoshi World No.1 jenjang nung küm tembangba nüngtem nung pa nem 2015 tebur ITF Player of the Year sempet agütsü.
America tsür Williams-ia Australian, French aser Wimbledon takok marok agizükba den külemi, US Open semifinal nung shilem agitsü jenjang tajung ngua tetsür World No. 1 nung küm tembangba nüngtem nung la nem 2015 tetsür ITF Player of the Year sempet tan agi 6 benbuba asoshi agütsü.
Tetsür doubles shilem nung Switzerland tsür, Martina Hingis aser India tsür, Sania Mirza nati iba nungtugu sempet agizük aser Netherlands nunger Jean-Julien Rojer aser Romania nunger Horia Tecau nati tebur doubles shilem indang 2015 ITF Players of the Year sempet agizük.
Taküm March ita nungi tenzüka asayaba sülen Hingis o Mirza nati Wimbledon aser US Open asayamong takok marok agizükba den külemi, tanga tongti asayamong 7 indang takok marok agizüka liasü.
Hingis-i tetsür singles shilem indang Player of the Year sempet agizüker küm 15 süir külen tan tetsür doubles shilem indang Player of the Year sempet ya agizüker lir.
Hungary tsür, Dalma Galfi aser America nunger Taylor Fritz natia tetsür aser tebur Junior shilem indang Player of the Year sempet agizükogo.