DMC-i gari lenmang 17 buba yanglushiogo

Dimapur, July 2 (TYO) : Dimapur Municipal Council (DMC)-i terenlok mapa maneni inyaka arudar aser ita 18 tsüngda nung parnoki Dimapur nung gari lenmang 17 buba yanglutsüogo.
Honibarnü Joint Director & HOD, Municipal Affairs, A Zanbemo Ngullie-i Sunrise colony, United North Block, Burma camp nung gari lenmang lapoktsü.l
Zanbemo-i tongti tesemdanger o jembidang, public-i teyari agütsüba ajanga DMC-i terenlok mapa inyakba atema pelaba metetdaktsü.
Tanü lapokba gari lenmangji joko public-i anepalutsü aser terenlok atema inyakba mapa nung public-i shilem agibaji kanga tongtipang. Sorkar dang dang teimla ayuba ajanga takok mangutsü saka public-i sorkar pusema yaria nungittsüla, ta paisa ashi.
“Nagaland state nung Urban Local bodies rongnung tajungtiba DMC lir” ta Zanbemo-isa metetdaktsü.
Tanü sentong nung DMC CEO, H Atokhe Aye-ia o tatsüka jembidang, DMC-i gari lenmangtem yanglushiba dang masü saka colony balala nung community dustbins aser concrete drainage slab tem yanglutsüogo, ta metetdaktsü.
November 2015 nungi sorkari DMC nem tax sarutsü atema temelaba agütsüba atema paisa sorkar dang pelaba metetdaktsü aser tool tax nung sarutetba sen ajanga item terenlok mapa inyakteter ta paisa shisem.