DMC-i Landmark colony nung gari lenmang aser RCC box culvert yanglu

Dimapur, March 22 (TYO) : Dimapur Municipal Council (DMC)-i terenlok mapa maneni inyaka arudar aser tanga parnoki Landmark colony nung gari lenmang yanglushiba den RCC box culvert ka yangluogo.
Tanü NIDC Chairman, H. Tovihoto Aye-i gari lenmang lapoktsüdang ashiba agi, DMC ajanga Dimapur nung temelenshi aika bener arutsüogo aser iba asoshi parnok nem tenüngsang agütsür.
Landmark colony ya office aser reju aika aliba tesem ka lir aser ano iba lenmang yagi Oriental colony aser state stadium den sendakteper. DMC-i gari lenmang yanglushibaji kanga dang tongtipang mapa ka lir, ta Tovihoto Aye-isa ashi.
Sentong nung DMC CEO, H Atokhe Aye-i o tatsüka jembidang, municipal body ka indang teinyaktsüji tzü, electricity aser lenmang amala nüngdaktep peritsütsüla, ta ashi.
DMC-i toll tax saruba nungi aazükba sen ajanga item terenlok mapa inyaker aser takokba tashi nübortem nüngdak peritsütsü meranger, ta H Atokhe Aye-isa metetdaktsü.
“Public-i nungita yariba aser amalitep akaba ajanga DMC-i alizüngtem tonga inyakteter aser iba atema public nem tenüngsasang agütsür” ta paisa ashi.
Paisa, nübortemi maneni DMC aser sorkar nungita yariteptsü ayongzük.
Dimapur nung terenlok mapa inyakba angudang DMC, CEO Atokhe ama mapa takok  ngua inyakba ketdangser ya Dimapur nung ano küm 5-6 ka inyakdaktsütsüla. Ibaji asünungbo Dimapur jila maneni renloktsü, ta Landmark Colony chairman-ia o jembidang ashi.
Tanü agiba sentong nung Landmark colony GB, vice president, NPF division, Dimapur aser Ex-DMC member, Lipok Pongen nungertemia o tatsütsü jembi.