DMC-i lease system indang jangjashitsür

Dimapur, Mongputeni (October) 16 (TYO): Dimapur Municipal Council (DMC) indang tolls aser urban utility fees talila agiba atema ashishiteper aser tebilemtsü onük ka adoka lir.
Tanü DMC-i ashiba agi state sorkari ‘lessee’ nem tax talila agitsü temelaba kecha magütsü.
State sorkari lessee shinga nema sorkari latetba dak alia tax sarutsü tashi agüja mali. State sorkari tax agitsü atema item 36 shimteta lir aser tawa MS road o tiles bendenlokogo, ta DMC Administrator, Moa Sangtam-i ashi.
DMC-i onok mulung nung masü state sorkar tetuyuba sülen anidaker. Sorkari latettsüba jenjangji entry points ajak nung yuja lir, ta paisa shisem.
DMC-i ita nung utility fees sarutetbaji sen lakh 55 shi ka liasü. Sorkari private contractors nem ita shia sen lakh 67.75 atema lease nung agüja lir.
Iba dak sendakba nung Naga Council Dimapur aser DMC tsüngda senden ka amen. Senden nung DMC-i taoba mapang item shia tax meshiba ama dang agitsü aser lateta aliba jenjang dang nungi teimba agiba lessee tem anentsütsü ta senden nung telemtetba agi.
DMC-i Naga Council Dimapur indang Naga Council Dimapur nem lessee puri inyakba mapa reprangtsü atema tashi agütsüogo aser parnoki lateta aliba jenjang dang nungi talila agiba osang bangdakpur dang sangoktsütsü.
DMC Administrator Moa-isa entry gate/collection ajak nung DMC Urban fee collection atema Lessee/ contractors-i tax agiba mita reprangtsü atema züngsem pezü agi akümba luden ka tentetogo.
Parnoki entry gate/collection point shia semdangtsü aser lateta aliba ama tax agir asü masü’ar mita reprangtsü.