DMC-i mezüng GPS vehicle tracking system tenzükogo

Dimapur, March 22 (TYO): State nung GPS vehicle tracking system mezüng tenzükba Municipality ji Dimapur Municipal Council (DMC) kümogo; DMC-i utility vehicles- dumper aser cesspool nung GPS vehicle tracking system tenzükogo.
Tanü GPS system tenzüktsüdang, Commissioner of Police, Dimapur, Limasunep Jamir (IPS)-i, Dimapur nübur nem tajungtiba tenzüktettsü atema iba ya junga apiteta inyakba mapa ka lir, ta metetdaktsü.
“Iba ya ajanga sorkar resources jung ketdangsüba dang masü saka maparen teladak asütsü. Tarutsü nunga DMC-i iba ama ano aika apiteta inyaktsü imlar,” ta pai ashi.
Administrator, DMC, Moa Sangtam-i, GPS inyakyim benokba ajanga sensotemi nüngdakba service angur, aser iba ya ajanga staff temi nüburtem tenzükba maparen parnoki inyaker asü meinyaker, ibaji metettsü, ta ashi.
Paisa, DMC-i online portal services tenzükogo, koba ajanga shishialembartem nem facilities balala agutsür, iba dak alia kobi melii ki para facility atema online payment tenzüktsü, ta metetdaktsü.
Computer Programmer, Sariyongba B Lkr-i, ketdangsübaren nung vehicle tracking system amshiba tajangzük aika lir, ta metetdaktsü.
Paisa, tang iba technology tasen tenzüker, anungji gari amshibayim tajungba akumtsü aser Dimapur Municipal Council jurisdiction aser Dimapur nung nüburtem tajungtiba tenzüktettsü imlar, ta ashi.
GPS ya Smart Automobile Management (SAM) ta ajaba app ka ajanga amshitsü, aser ibaji android mobile phone ka nung install asütsü. Iba ya ajanga na gari nungi pilar alidang na kong ali’ar jangjatsü.