DMC nung Non Locals anioktsü memelar: DNSU

Dimapur, July 29, 2024 (TYO): Dimapur Municipal Council (DMC) nung Non Locals nomination asüba atema mepelar aser iba inyakyim magizüker ta Dimapur Naga Students’ Union (DNSU)-i metetdaktsüogo.

“Indian Constitution nung Arrla 371 nung lateta aliba onüktem nung ajemdaker Nagaland Municipal Act 2023 yanglu. Naga nungeri mapang tamajung aika ajangshia aruogo aser Naga nunger kümzüka ayutsü atema inyakdang nisung taküm aika laluogo. Anungji Naga nunger maitsü balaka ta asüba agizüka Constitution of India nung Arrla 371(A) enoksem aser iba Arrla ya odang enokba masü saka asen Naga nunger mezüngpurtem azü aser asentzü ajanga enoktetba liasü” ta DNSU President Hinoto P Aomi aser General Secretary Michael Kath nati ashi.

“Nagaland sorkar aser MLA temi Arrla 371(A) ya kanga junga angatettsüla. Iba ya tema tazütsü atema enokba masü saka Naga nungeri yimsü asütsüba, lemtet agitsüba aser kümzüka alitsü temeten agütsüba lir. Anungji Arrla 371(A) nung ajemdaker ang sorkari ketdangsüba mapatem inyaktsüla” ta DNSU-i ashi.

NMA 2023, Chapter 2, Para 10 (3) nung “Municipal Councils indang kanga junga meteta alir mesüra Municipal Councils nung inyaka alirtem sorkari nominate asütsü ta shia lir. Anungji Dimapur Municipal Council maparen meteta alir lisopur peria dang lir” ta DNSU-isa ashi. “Dimapur nung tesüiba nung Inner Line Permit (ILP) mapa tenzük saka kuli kecha magütsüi dang iba mapa anena lir. Dimapur ya Nagaland asoshi kishizüng ka ama lir anungji ILP melira dala maliba ki ka mesüka lir. Anungji ozüng alema arurtem mita anüktsü mapa takang alitsüla aser bendangertemi election maparen nung lemtet agirtem ama shilem agidaktsübaji asen sasa asen raksaba ama asütsü” ta DNSU-isa metetdaktsü.

“Dimapur ya Naga nunger ajak meyong lir aser Dimapur nung Naga nungeri yimjung meima aser ozüng akhümtsübua tangar ajak den linür saka iba atema asen yimtenren, lokti aser rongsenketzüng yoka machitsü” ta DNSU-isa ashi. “Naga Students’ Federation-i tuyuba ama tawa urban local elections nung DNSU-i non-Naga nunger shilem agiba anema noktak saka sorkari Naga nunger tebilemtsü abenba aser taginüba senzüka yutsü. Anungji DNSU den onok Tribal Unit ajaki Dimapur Municipal Council nung nominations ajanga non-Naga nunger aniokba anema noktaktsü.

Dimapur nung alirtemi onok yimjung nung alitsüpur ajak pelashishia agizüker aser parnoki onok taginüba akhümtsübutsü imlar” ta DNSU-isa metetdaktsü. “Külen, Dimapur kübok ward balala nungi councilors nem political party ajanga ticket agütsü asütsü akok saka nai takok angubaji nübortemi vote enoktsüba ajanga lir ta angatettsüla aser iba ama ken o atema ola adoktsüla” ta DNSU-isa ashi.