DMC & Town council candidate ajak anentsüla

Dimapur, Jan.22 (TYO): Tang Dimapur district kübok municipal aser town council election nung tokteptsü asoshi tenüng agüja alir Aotsür Aor candidate ajak asen lima temeten wazüka ayutsü asoshi tekaratiba nung ‘retire’ asütsüla ta Ao Senso Telongjem Dimapur (ASTD) den Dimapur nung ward aser council balala nung Aor tongti pur aser yimsüsürtem telongjem senden ka yangi ASTD kimen nung Deobar nikongtsütsü alidang lemtetba osang ka metetdaktsüogo.
Iba kasa telemtetba mapa küma inyaktsü asoshi colony aser ward shia nung yimsüsürtemi pei pei yimten telongzük nung inyaktsü aser Municipal Act nung teyanglushitsü aliba meyanglushi tashi election magidaktsütsü ta parnokisa lemtet.
Kasa tebilemtsü onük nung Hombar anepdang 10:00 ako nungi ADC court anasa state stadium nung ‘public rally’ sentong akatsü aliba nung Aotsür Aor ajak kangtepa arutsüla ta ASTD sangdong ka ajanga nenshia metetdaktsüogo.