DMHSS Governing Body-i takok angur nem tenüngsang agütsü

Dimapur, May 15 (TYO): Tawa NBSE 2017 result sangdongba nung takok ngua school nem tenüng tajung bener arutsüba atema Dimapur Mission Higher Secondary School (DMHSS) Governing Board-i kaketshirtem nem tenüngsang agütsüba sentong ka ayongzüka agi.
Hombarnü DABA Town Fellowship nung HSLC aser HSSLC Examination 2017 nung takok angur nem tenüngsang agütsüba sentongji ayongzüka agi.
HSLC tatidang nung kaketshir 31 nungi parnok 23-i first division aser 8-i second division nung takok angu aser küm pungu tashi atongtepa 100% pass percentage ngutet. Maneni, kaketshir 112-i HSSLC tatidang agütsüba nungi parnok 99-i takok angu.
Tanü agiba sentong nung School Governing Body-i distinction angur aser subject tesayurtem nem sempet agütsü.
“Tanü kaketshirtemi takok angubaji tetenzüker ka dang lir. Meranga azüngertemi tarutsü nungi sempet tajungba angutsü, anungji kaketshirtemi tang takok angubaji teperi ta mebilemi, tali merangtsüla” ta School Governing Board, chairman, K Temjen Jamir-i tajungshi o jembidang ashi.
“Alima nung nisung ka taküm nung ayongayonga alitsü masü saka teinyaktsü mapa agi sünga lir. Asenok iba lima nung ali tashi, asen taküm nung tayongzükba jenti ajurutsü aser asenoki itemji koktettsüla” ta K Temjen-isa kaketshirtem ayongzük.
Paisa, takok anguba kaketshirtem aser tesayurtem dang school nem tenüng tajung bener arutsüba atema pelaba metetdaktsü aser “telok ka külemi inyakba ajanga takok angur” ta paisa shisem.
Sentong nung DABA sannüker, Rev. Dr. N Tzudir-i sarasadem aser sempet angurtem rongnung Mantok Konyak-i o jembi.