DMHSS nung tesayurtem anogo among

Dimapur Mission Higher Secondary School  nung tesayurtem anogomong sentong agiba sülen  tesayurtem den  Governing Board  Members kar noksa nung angur . Sept.05, 2016.

Dimapur, Sept.05 (TYO) :  Linük ajunga den külemi Dimapur Mission Higher Secondary School nunga tanü Hombar nü Tesayurtem Anogo sentong tajung ka ayongzüka mongogo.
Iba sentong nung tesayurtem nem akümtsübu agüja kaketshirtemi kentenmenü, jilushi aser tesayurtem ajungba indang jembiba shilem tajung aika agia liasü.
Iba sentong nung School ketdangsertem tenüng nung jembidang, School Governing Board nung züngsem Dr. Bendangjungshi-i tesayurtem nem tenüngsang agütsü. ” Takok anguba nisung shia taküm nung tesayur tajung kaka lir, shibai tanur ka lokti asoshi tagidak akaba nisung ka küma sayutetter. Tesayurtem ya loktiliba nung ajak dang nungi tajungtiba nisungtem lir, anungji asenokia parnok nem akümtsübu tulu agütsütsü tim,” ta paisa ashi.
Dr.Bendangjungshi-isa tanü asen lima teraksa tia nung aliba ya yanglushitsü atema alima aser nübortem miema inyaktsü tangatetba aliba nisung kaka kümdakja tanurtem sayutettsü nüngdaker ta tesayurtem ajungshia ashi.
DMHSS nung küm shia tajungtiba tesayur ” Teacher of the year ” shimteta sempet agütsür aser taküm 2016 küm asoshi iba sempetji Ms. Mereninla nem agütsütsü shimtetba osang School Governing Board nung mendenbuba Wb.K.Temjen Jamiri metetdaktsü aser Board nung züngsem Dr. Maongkala Longchar ajanga iba sempetji agütsü. Iba denji külemi School ketdangsertemi tesayur aser school nung inyakertem ajak nem sempet kaka agüja liasü.
Iba sentong nung Rev. Lima Jamir, Associate pastor, DABA-i temoatsü meshia sarasadem.