DMHSS tesayurtem angazükshiba sentong agi

Dimapur, August 27(TYO) : Dimapur Mission Higher Secondary School (DMHSS) nung tesayurtem asoshi tanü putu den peta tanurtem sayutettsü asoshi tangazükshiba sentong ka tanü Mongolbar nü Dimapur Ao Baptist Arogo meyong Elim Hall nung agiogo. Iba sentong nung shisalen teyurji Shillong nungi tesayur Wb.Butusen Ozüküm liasü.
Iba sentong nung tesayurtem rongnung telok tilala lemsar shisalemsatepba mapang, tanurtem aser parnok tsüraburtemi tesayurtem dak nungi imlabatem aser kaketshirtem nüngdak reprangteta anepalutettsüba lenmangtem indanga jembia liasü. Iba shisatokden mapang nungsa, shisalen sayuri anir tesayurtem rongnung tanurtem taküm nung shisabolu khuret ajuruba dera aser item timtemji kokteta kaketshirtem taküm yanglushitsütsü nüngdakba indang shisalemsatepa liasü.
Kasa sentong nungsa, tanü putu nung technology tapu balala amshia kaketshisatsü sayuba aser angazükba mapatem ya kanga nüngdaka kümaka, akhidang nungi tesayurtem bang nungi tanurtem dang meima sayuba yimyatem ajakbo memelendoktsüla, kechiyong iba jagi dang tanurtem mulungjang nung kongshir ta shilem agir tesayurtemisa tangatetba lemsatep.
Tesayurtem rongnungsa, joko putu yimyai akanger asünungji, tesayurtema ICT amshi kanga junga metettsü nüngdakba indang kanga süoki ia shisalemsatepa liasü.
Iba sentong tetenzüklen okila School Governing Board nung mendenbuba Wb.K.Temjen Jamir-i jembi aser tesüsa shilem agirtem ajak dang pelaba o School Principal, Wb. Alemtushi Imcheni metetdaktsü.