DMHSS ya shisaliok angazükdak dang masü, taküm melenshidak lir

Dimapur Mission Higher Secondary School nung taküm 2016 küm HSLC aser HSSLC tatidang nung ajak dang nungi tematiba takok angurtem nem tenüngsang agütsüba sentep sentong nung tesayurtem den DABA sannüker, Rev.Dr.N.Tzüdir dena agiba noksa ka yangi angur. Dimapur, May 12, 2016.

Dimapur, May 12 (TYO): Taküm 2016 küm Nagaland Board of School Education (NBSE) ajanga agiba class 10 aser 12 tatidang nung Dimapur Mission Higher Secondary School nungi takok tajung angurtem nem tenüngsang agütsüba sentong ka Dimapur Ao Baptist Arogo (DABA), Town Fellowship tenla kidang tanü Brehostibar nü agiogo.
Taküm küm iba school nungi class ter tatidang nung nisung 38 agütsüba nungi ajaki takok angu, aser parnok takok angurtem rongnung ana dak alaka ajaki 1st Division jenjang nung takok ngua liasü. Ano, class 12 nung parnok 99 agütsüba nungi parnok 92-i takok tajung angu. Tanü parnok rongnung class 12 nungi tematiba jenjang angur ka nem aser class 10 nung nisung pongo nem ta tenüngsang sempet agüja liasü.
DMHSS ya DABA-i lapokba school ka lir aser taoba küm asem tashi class ter tatidang agütsürtem ajaki takok tajung angur.
Iba sentong nung tenüngsang agütsüba o tatsüka jembidang, DABA nung sannüker, Rev.Dr.N.Tzüdiri school tajungba küma aoba asoshi Tsüngrem nem tenüngsang agütsü aser tesayurtem aser kaketshirtem ajak dang meranga inyakba ajanga takok tajung bener aruba asoshi pelaba metetdaktsü. Paisa kaketshirtem dang Tsüngrem tsübutsü aser peisasa pei azüoka temulungtetba tulu nung kaketshisatsü bushitsü ajungshi.
Tanü iba sentong nung DABA sannüker ajanga HSLC aser HSSLC tatidang nung takok angurtem nem sempet agüja liasü.
Iba sentong nungsa School Governing Board mendenbuba, Wb.K.Temjen Jamiri takok angur kaketshir aser tesayurtem nem tenüngsang agüja jembidang, “DMHSS ya kaketshisatsü angazükdak dang masü saka taküm melenshidak aser tanüla chiyongtsü angudak tesem ka lir,” ta metetdaktsü.
“Kibong kar nung tebilemtsü aketba tanurtem kar danga lira aser tsüraburtemi pei chirnurtem taküm Tsüngrem tsübuba nung indaktsünüra, DMHSS-i yokang,” ta paisa metetdaktsü.
Paisa DABA-i akok tashi school nüngdak repranga anepalua aruba agi tanübo school kanga junga kümogo aser ano sangküm result-sa tajungba asütsü imlar ta Arogo dang pelaba o ka den teimla o ka metetdaktsü.
Iba kasa sentong nung School Governing Board nungi züngsem aser DABA deacon, Dr.Sünep Imcheni tesayur aser tanurtem nem tenüngsang agütsüba aser tajungshi ken o ka lemsatepdang, tanü putu nung kaketshirtem yabo alima yanglur ka dang masü saka alima nung temelenshi bener arurtem lir, anungji item nükjdongji tongteta inyaktsü asoshi Tsüngrem tsübua pei mapa nung nendaka inyaktsü tenüngdaktsü ta metetdaktsü.
Tanü School nungi sempet angurtem rongnung Kr. Purnungla aser Sp.Hopong C Phom nati tenati ajangshiba aser pelaba o lemsatepa liasü.
Tanü iba sentong tenzüka DABA nung Associate pastor, Rev.L.Lima Jamiri sarasadem aser School Governing Board nung züngsem Dr.Jamedi Longkümer menden liasü. Iba sentong nungsa tanurtemi ken aten aser DABA nung tetsür tesayula Wt. Moamonglai Tsüngrem ket nung School bendanga agütsüba sarasadem ka agir sentong atem.
Taküm DMHSS nung class 11 nung züngner nisung 200 dak talii admission form bener ogo aser tang admission agidagi. Iba school nung tetsür aser teburtem asoshi hostel lir aser Tsüngrem tenzüker chirnurtembo school nunga seat tangar dang nungi dalangba agi angutsü.