DMK-i Tamil nung khenyongi yi nokdangtsü: Karunanidhi

Chennai, April 25 (Agencies): Tanü Hombarnü Chennai nung DMK Tir, M Karunanidhi-i, par party sorkar tashii arura parnoki Tamil Nadu tesem ajak nung khenyongi dang yi nokdangtsü, ta metetdaktsüogo.

State nung yi ayokba aser ajemba nokdangtsü atema nangzükbaji DMK-i meinyaktettsü ta jembiba o dak sentakba nung tanü DMK tongtii iba o jembi.

“Yi ajemba ajanga tamajungtemji asadanger, office mapa tenzükba (DMK-i election nung takok ngura) sülen onoki mezüng, yi khenyongi nokdangtsü,” ta Deobarnü election nüboyim senden ka nung Karunanidhi-i ashi.

AIADMK tongti lenir aser state Chief Minister, Jayalalithaa-i, lai state nung yi tanem-tanemi nokdangtsü ta jembiba dak sentakba nung DMK tongti Karunanidhi-i, “Tanem-tanemi yi nokdangbaji kechi (?) Onoki ibaji magizüker. Onoki khenyongi dang nokdangtsü,” ta ashi.

“1970s mapang nung state nung anema alibaren tajungba atema onoki yi nokdanga liasü, aser tesülen DMK-i yi ayokba tali tesashiba nokdanga yi shishirtem nem temerenshi tulu agütsü. Ajisüaka onok madak takok angur, AIADMK-i yi ayoktsü atema temelaba agütsü aser tatemsabo parnok yimsüsüba state sorkar kübok yi ayok,” ta DMK lenirisa ashi.

“Yi ajanga nüburtem takum, talisa lanurtem raksatsüogo. Onoki tashii arura nisung shingai yi majemtsü atema onoki inyaktsü,” ta paisa shisem.