Dmr-Kma 4-lane lenmang December ita tenzüktsü: Nuklutoshi; Hopta ishika tsüngda NH-2 atema senotsü agütsütsü imlar

Kohima, June 16 (TYO): Brihostibarnü PWD (National Highways), Mechanical & Elections Minister, Nuklutoshi-i, Dimapur-Kohima National Highway-29 4-lane gari lenmang 2016 December ita tashi nungbo tenzüktsü, ta metetdaktsü.
Tanü nikongdang Kohima nung sentong ka tembangba sülen osangbenertem den jembidang Nuklutoshi-i, ali kiburtem nem teyari agütsüba maparen tembangogo aser contractor nema work order agütsüogo, ta metetdaktsü.
NH-2 kilometer 40 nungi kilometer 72 (Tseminyu-Wokha sector) 2 lane yanglutsü dak sentakba nung tasüngdangba ka langzüdang Minister-i, hopta ana tsüngda Union Ministry of Road Transport & Highways-i senotsü lemzüktsütsü, ta ashi.
Pai ashiba agi, Union MoRTH nem Detail Project Report (DPR) agütsüogo aser kasaji agizükogo. Ajisüaka sen crore 400 dak tema ano melemzüktsüi lir. Senji lemzüktsüba sülen tzünglu aruba mongpu temer mapa tenzüktsü.
Paisa, tawa Guwahati nungi Union Ministry nung  Regional Officer-i physical inspection agiogo aser taruba hopta ana tsüngda terenlok karbosa alitsü imlar, ta metetdaktsü.
Minister-i ashiba agi, pa den Chief Minister, T R Zeliang-i Union Minister anaben tashi ajuruogo aser kobi melii senji agütsütsü ta tena dang shiogo.
Ajisüaka technical timtem kar aliba ajanga tang tashi Ministry-i senotsü melemzüktsü, ta paisa shisem.