Dmr nung Lokayukta atema senden amen

Dimapur, March 28 (TYO): March 22, 2019 nü Circuit House, Dimapur nung Lokayukta, Nagaland, Justice Uma Nath Singh-i Dimapur Deputy Commissioner, Kevekha Kevin Zehol, Deputy Commissioner of Police, Zone-I, Dimapur, Dr. Naieem Mustafa, IPS (Commissioner of Police, Dimapur tenüng nung adenba) den senden ka ayongzüka menogo, ta tanü ketdangsertem osang ka ajanga metetdaktsü.
Iba senden nung taoba State Vigilance Commissioner aser Upa Lokayukta (designate), Mayang Lima-a tetushi tejaoker ama aden.
Senden nung Lokayukta-i ketdangsertem dang, nüburtem nem Nagaland Lokayukta Act indang angatetdaktsütsü aser inyakyim metetdaktsütsü atema Lokayukta Awareness Programme ayongzüka katsütsü nüngdak, ta metetdaktsü.
April 15, 2019 nü anüngdang 12:00 ako nung DC conference hall, Dimapur nung Lokayukta Awareness Programme ka akatsü lemtetogo, aser iba sentong atema Dimapur DC dang NGOs aser lokti tentettem nungi züngsemtem, HoDs ajak aser Village Council/ GBs dang iba sentong nung adentsü metetdakjang ta tuyuogo, ta kasa osang nung shia lir.