Dmr nung Measles Rubella campaign atema senden amen

Dimapur, Chiteni/July 07 (TYO): Chiteni/July 06, 2018 nü DC office conference Hall, Dimapur nung District Task Force Committee-i district nung Measles Rubella campaign agitsü atema senden ka menogo, ta tanü ketdangsertemi osang ka ajanga metetdaktsü
Senden mendenbuba Dimapur ADC, Albert Ezung-i züngsemtem ajak pelaa agizük.
ADC-isa India nung Measles Rubella campaign tenzükba mapang nungi iba campaign ajanga India ama nütsüng aika aliba linük tajangzükba anguba indang tongmelang agi lemsatepa liasü.
Pai department dang nütsüng aika aliba tesemtem jangjatsü aser asalentong yanglua tanen makai ketdangsüa inyaktsü mepishia metetdaktsü.
Senden nung World Health Organisation (WHO) nungi Dr. Abhishek-i, MR campaign nükjidong ya measles samatsütsü aser Rubella azüoktsü atema lir, ta ashi.
“MR campaign atema asenoki sentong yanglutsü nüngdak, kechiyong asenok aikati measles indang meteta lir ajisüaka nüburtem aika nem iba ya rajemdaktsütsü nüngdak. Iba tebilemtsüji temelungjang nung yur nüburtem nem awareness agutsütsü atema MR campaign ya tenzüka liasü,” ta pai metetdaktsü.
Paisa Power Point presentation ajanga MR Campaign indang nükjidongtem aser asalentong balala lemsatepa liasü.
Pai ashiba agi, 2020 küm tashi nungbo Measles ya samatsütsü aser Rubella ya azüoktsü.
Vaccine liaka kanga tanurtem aika asüba tongti kulitem rongnung rubella aser measles na densema lir, ta pai metetdaktsü.
Senden nungsa DIO, Dr. Rebecca-i, MR vaccination campaign nung department balala teinyaktsü shilem metetdaktsü, kechiyong medical department kijaibo iba nükjidong takok mangutsü.
Lai state level nung inyakba mapatem, schools aser shisaliok indang metetdaktsüba den külemi school tem nung tesayurtemi vaccination team amai shilem agitettsü, vaccine tajung agutsütsü aser lokti senden ayonga akatsü atema metetdakja liasü.
“Women & child development-i tetsütem senden ayongzüka agitsü aser yariteptsü; campaign jelia peipei tesem nung nüburtem nem iba indang angatetdaktsütsü,” ta lai metetdaktsü.
“MR campaign nung mass media-a dendaktsütsü. Iba mapa ya kanga tulu, ibayongji iba campaign takok ngua katettsü atema department ajak nungi teyari nüngdaker, kechiyong iba campaign ajanga tanur ajak (100%) ayimjemtsü nükjidong yua lir,” ta lai metetdaktsü.
Iba dak alia senden nung District Task Force Committee züngsem ajaki peipei tebilemba onük lemsatepa liasü.
Nagaland nung MR campaign ya taküm Mongputeni/October ita nungi tenzüka agitsü, ta kasa osang ajanga metetdaktsü.
.