Dmr STO-i DDPA indang jangjashitsür

Dimapur, Metsüremi 19 (TYO): Tanü Senior Treasury Officer Dimapur office-i sangdong ka ajanga, pension/family pension indang ROP dak sendakba nung state sorkar tetuyuba nung ajemdaker pension arrears renema agutsütsüji Treasury Office mapa lir, ta metetdaktsü.
Iba dak sendakba nung tawa state Finance department-i 7 ROP kübok revision of pay of pension atema order agutsüogo, ajisüaka financial year atongba mapang sorkar transaction nung Treasury ketdangsertem mazüngi aliba ajanga revision arrears aser nüngdakba release mesüteter, ta metetdaktsü.
Anungji, item mapa inyaktsü atema ketdangsertem mapang madok tashi pensioner ajak dang khen aremzüka atatsü asoshi mepishia metetdaktsür, ta office-isa metetdaktsü.
Ano Metsüremi 18, 2018 nü osangkaket ka nung DDPA-i sangdong ka agutsüba dak sendakba nung yamai jangjashitsür, Dimapur district Pensioners Association DDPA inyakyimji Treasury office kübok masü, anungji pension revision financial implication reprangshitsü atema financial expert committee tentettsü asoshi sen 2000/- saruba mesüra ROP form issue asübaji DDPA maparen lir.
Iba dak sendakba nung pensioner tem dang nüngdakba osangtsüsang atema Dimapur Treasury Office den masü saka association den metetpelatsüla, kechiyong office-i iba indangji memetet, ta Dimapur STO-isa metetdaktsü.
Iba dak alia nüburtem, talisa pensioner tem dang yamai metetdaktsür, sorkari temelaba ka agutsü mesüra association-i agutsüba forms kecha Treasury Office-i magizüktsü.