Dmr Surveillance team-i sen lakh 10 apu

Dimapur, Tsüklai 21 (TYO): Election merüka tesünep nung agitsü atema Dimapur district administration-i surveillance team balala- static surveillance teams, flying squads, video surveillance team, Central Paramilitary Forces aser Assam Rifles ama lemsar sen tali indoktsüsa aliba tongtibang tesemtem nung surveillance teams lemzükja lir.
Item team-i garitem sota sen aser yi bener senzüba mita repranger; yamaji mita reprangdang Tsüklai 20, 2018 nü UBSI Jenpemo Patton-i aniba surveillance team aser Magistrate for Static Surveillance team-i Patkai bridge Chumukedima nung taxi ka soter mita reprangdang Kohima nungi Dimapur-i alur passenger ka ket nung kulikaket kecha mebeni sen lakh 10 bena aliba apu.
Team jagi senji apu aser Income Tax department-i ibaji bushisüngdangdar.
Election Commission tetuyuba nung ajemdaker iba senji election dak sendakba nung tim mesüi amshitsü atema asü masü’ar ibaji bushisüngdanger.
Iba dak sendakba nung Dimapur DC aser DEO, Sushil Kumar Patel-i nüburtem dang election agiba anogo tashi sen aika bener mesenzütsü metetdaktsüba den külemi election timi tajungtiba nung agitettsü atema timtem liaka tashi angadaktsüner, ta mepishia metetdaktsü.
Iba dak aliba DC-isa, election inyakyim dak mapetba kar danga putetra DC office nung monitoring cell nem phone no. 9402041471 ajanga metetdakjang, ta shisem.
Ano election nüboyimba mapang nung candidate temi sen tali-tabong indokba video mesüra noksatem kuli atema ECI-i shima aliba Expenditure Observers nem item contact ajanga metetdakjang Shiv Shankar IRS: 1344 (Ghaspani) 8837383492; RR.Clement IRS:2334 (Dimapur 1, 2 & 3 atema) 8837378558; ta Sushil Kumar Patel-isa metetdaktsü.