DNA Scientist 3 nem 2015 Nobel Chemistry Prize agütsür

Stockholm yimti kübok Royal Swedish Academy kilung nung Nobel Assembly züngsemtem, Professor Sara Snogerup Linse, Professor K. Hansson aser Professor Claes Gustafsson nungeri osangbener den ajurutepba noksa nung angur. (Stockholm, October 07)

Stockholm, October 07 (Agencies): Sweden kübok Stockholm nung tentetba Nobel Prize ludeni nisung indang DNA tajungba küma yanglushitsü maparen rendaktsütsüsa inyaktetba nüngtem nung DNA scientist 3 nem 2015 Nobel Chemistry sempet agütsüogo.
Iba sempet agütsütsü asoshi shimtetertemji Britain nung tentetba Sir Francis Crick Institute & Clare Hall Laboratory nung scientist, Sweden nunger Tomas Lindahl; Duke University nung scientist, America nunger Paul Modrich aser US kübok North Carolina nung tentetba University of North Carolina nung scientist, Turkey nunger Aziz Sancar nunger aliba osang jangjaogo.
“Lindahl, Modrich aser Sancar nungeri nisung temang nung aliba DNA tajungba küma yanglushitettsü osang bushiteta atema kanga pelar. Par asemi tan bushitetba ya cancer tashidak agi shirangertem atema tajangzük tulu asütsü,” ta Nobel Assembly züngsem, Professor Sara Snogerup Linse-i metetdaktsü.
2015 Nobel Physics sempet Takaaki Kajita aser Arthur MacDonald na nem aser Willam Campbell, Satoshi Omura aser Tu Youyou nunger nem 2015 Nobel Medicine sempet agütsütsü renemba osanga tan hopta tetenzülen metetdaktsüogo.
Tesüiba mapang, 1901 nungi tenzüka Sweden nung osettsüset tasen porateta yanglur, asür Alfred Nobel nüngtem nung Medicine, Physics, Economics, Chemistry, Literature aser Peace shilem nung tangar dak alia inyaktetter takotet nisungtem shima parnok nem sempet aser senpet sen agüja arur.
Taküma iba sempet agütsüba sentong ya Oslo aser Stockholm yimti na nung taküm December ita agitsü ayonga lir.