DNLE-i Tokhu Emong benjung among

Dimapur, Yimpoksüi/November 07 (TYO): Yimpoksüi/November 07, 2018 nü Diphupar Nkonjan Lotha Ekhung (DNLE)-i 42buba Lotha Tokhu Emong ayongzüka mongogo, ta ketdangsertem osang ka ajanga metetdaktsü.
Sobaliba sobutsü sobur Diphupar area nung alir Lotha nunger tanur-tain ajak Agri Expo site nung adenshia Tokhu Emong benjung longsoa mongogo.
Iba anogomong nung Rev. Dr. Ezamo Murry-i iba benjung ratet metetdaktsü, Lotha Baptist Church Diphupar Choir-i sobaliba kensü nung ken aten aser Tselamo Kikon-i tanü putu kensü nung Lotha nunger ken ka aten.
Kasa sentong nung kenten, kiyong tsüngda arr atsütepba aser sobaliba kenten tetoktepba liasü.
Catechist Infant Jesus Church Pastor, Orenthung Yanthan-i sentong tenzüka sarasadem aser Lotha Baptist Church Diphupar Pastor, Limhathung Lotha-i temoatsü meshia sarasadem.
Chairman Lotha Ekhung Diphupar, Zuchumo-i lokti pelaa agizükba o jembi aser General Secretary Lotha Community Diphupar, E.Zuben Patton-i tepela anküp o jembia liasü. Tatemsa Associate Pastor, LBCD, Yimstu Yanthan-i tenüngsang agüja aser chiyungtsü meshiteta sarasadem.