DNSU-i education department den tebilemtsütem lemsatep

Dimapur, November 19 (TYO): Dimapur Naga Students’ Union (DNSU)-i school tem sema senzüba osang school education department nem agütsüogo aser parnoki January 18, 2020 matongdang tebilemtsü onüktem reprangshimtsü atema luden ka tentettsü mepishia metetdaktsüogo.
DNSU school tour ya ita trok shi tashi inyak aser iba mapa nung yariteper ajak dang kanga pelar, ta Secretary Education & Statistics Tenyebinlo Himb-i ashi.
November 18, 2019 nü iba indang osang ya Principal Director lia education department nem agütsüogo aser onüktem lemsatep. Iba mapa nung sorkar school tem dak tali temulung agüja inyak kechiyong nija school tem dang nungibo sorkar school tem nung ang teinyaktsü teimba lir, ta paisa ashi.
DNSU-i agütsüba report nung proxy tesayur ayuba, subject teachers peria maliba, classrooms tajungba akümtsüba, Mid-Day Meal scheme timi inyaktsüba, Grade IV & ministerial staffs nüngdakba, tzü tajemtsü agütsütsüba, fans & lights agütsütsü, uniforms & textbooks supply peria magütsüba, schools tem upgrade asütsüba, tzümetsüng mapang timtem ajuruba school tem aser tanga tebilemtsü aika dena lir.
DNSU-isa education department dang Samagra Shiksha taoba SSA/RMSA kübok teinyaktsü ajak shitak inyaktsüba, RTE Act 2009 mapa küma inyaktsü, school kimung arrtsü ladangtsüba, biometric attendance inyakyim tenzüktsüba aser tesayurtem lemsashitsü onüktem agütsüogo.
Item tebilemtsütem asoshi inyaktsü atema January 18, 2020 matongdang sorkari luden ka tenteta mapa nunglokjang ta DNSU-isa takhangba agütsü.