DNSU-i HSLC/ HSSLC tematiba takok angurtem tushi

Dimapur, June 17 (TYO) :  Dimapur nungi HSLC & HSSLC 2016 tatidang nung takok angur nem Hokolbarnü Town Hall, Dimapur nung tenüngsang agütsü.
Dimapur Naga Students Union (DNSU)-i ayongzüka agiba sentong nung Dimapur nungi kaketshir 44 nem tenüngsang agütsü. Parnokji HSSLC (Arts) nungi 5, HSSLC (Commerce) nungi 9; HSSLC (Science) nungi 6 aser HSLC nungi 24 lir.
Iba sentong nung Flood & Irrigation Parliamentary secretary, Jacob Zhimomi tongti tesemdanger asütsü jaoka liasü saka pa kodamasüba timtem kar ajuruba ajanga marutet aser SDO (Civil), Dimapur, Albert Ezung-i tongti tesemdanger ama shilem agi.
Sentong nung o jembidang Albert-i ashiba agi, shisaliokji tajungtiba akümtsü atema dang masü senso tajung ka akümtsü atema hadir ka lir.
Shisaliok ajanga nisung ka yimyatsüya tamendakdak yanglutsür anungji kaketshirtemi seno tajung ka ka akümtsü atema merangtsü ayongzüker, ta paisa ashi.
Iba sentong nungsa Commissioner of Taxes, Asangba Chuba Ao, IAS-i kaketshir ayongzüka o jembi aser Rev. Dr. Visor H Zeliang-i takok angur asoshi sarasademtsü.