Doctor ka aser nurse ka tepuokdak ayutsü obendang agütsü

Guwahati, Luroi/August 23 (Agencies): Shiranger mapang shidak nung anepalu masüba atema Tinsukia kübok Lokapriya Gopinath Bordoloi Civil Hospital nung inyaker doctor ka aser nurse ka ta küm 2 tepuokdak ayutsü asoshi obendanga agütsüogo, iba den ano tena dang senchi sen 3000 (nisung shia) chiogo.
Additional Chief Judicial Magistrate Dr Chetana Khanikar-i, Dr. Mamoni Dutta aser Nurse Bimala Dutta na tepuokdak ayutsü asoshi obendang agütsü.
2013 küm October ita nisung ka tenüng agi Pradip Kakoti temang mejungi Lokapriya Gopinath Bordoloi Civil Hospital-i temang anepalutsü atema anir aru. Paji prodomes of Malari agi shiranga liasü .
Pa nem nurse Bimala Dutta-i saline ka tuloktsü aser Dr. Mamoni Dutta-i repranga liasü. Idangji Dr. Mamoni-i shiranger anükertem dang Falcigo injection ka bener arutsü asoshi tetuyuba agütsü, ajisüaka ghonda anashi dang lir Pradip Kakoti ya süadok.
Osang ajanga ashiba agi, tasür kinungertemi tasümang tabeni aruba mapang Falcigo injection koba Dr. Mamoni Dutta-i shiranger anepalutsü asoshi meshi iba ya langbang nung yua aliba angu.
Okadak-i tenük kuli agütsür nisung 9, kulikaket tenet aser oset ana tendanga liasü.
Kasa mapang nung obendang nungsa CrPC Section 428 kübok aija alirtem tepuokdak liadoker aliba mapangji, okadaki küm 2 temerenshi agütsüba nungji densemtsü ta metetdaktsüogo.