Dodon Moldova Tir tasenba akümer

Chisinau, November 14 (Agencies): Moldova linüki yashi, Deobar nü ayonga agiba Tir shimtsü tatembangba election sentong nung Russia pusemer candidate, Igor Dodon-i temaba jenjang ngua, par linük Tir tasenba akümtsü temeten nguogo.
Election nüboyimtsü sentong nung Russia den tesendaktep tajungba küma yanglushitsü tenangzükba sangoktsüsang, Dodon-i vote noklang nung shilem 55.3 tashi ajangzüka, Europe den sentakteptsü alizüng ayur candidate, vote shilem 44.7 ajangzükla, Maia Sandu madak takok angu.
“Ozü teloki tan election nung takok ngugo aser iba osang ya ajaki meteta lir,” ta nütsüng yongsük nisung million 3.5 shi madak yimsü asütsü temeten angusang, Dodon-i election nung takok aguba osang angazükba sülen osangbener den ajurutepdang sangoktsü.
Hopta ana tejaklen agiba mezüngbuba Tir election sentong nung Dodon-i Tir tasenba akümtsüsa jenajng tera agi dang mangui süidaktsüba sülen tan asangsang nung Tir tasenba akümsü jenjang angur lir.
Dodon-i Tir menden benokba sülen kidangsüa aliba Romania aser Ukraine linük na den tesendaktep junga yanglutsü alizüng ayuba osanga sangoktsüogo.
Ajisüaka, Russia-i 2014 küm Ukraine nungi Crimea peninsula tashiyim agi agiba maparen nung Dodon-i Russia pusema, metentsüba yong pai benokba tanaben sentaktepshitsü mapatongji Ukriane nung alir nübur timbakati anemtsü akok.
Ano külen, taoba Moldova education minister, Sandu-i lar election nüboyimtsü sentongtem nung par linüki Europe den sentaktepa alitsü tenangzükba metetdaktsüba den Moldova kübok Russia oshi jembiba tesem, Trans-Dniester nung yuja aliba Russia mitkar meyirijang ishika anitetadoktsü takhanga benoka liasü.
Kidangsüa aliba Bulgaria linüki Russia pusema nungiter candidate, General Rumen Radev par Tir tasenba inyakdaktsütsü atema shimba mapang ka nung Dodon-ia tan Tir tasenba akümtsü temeten angur lir.
Bulgaria ama, Moldova linükia küm ishika tsüngda nung ozüng alema ochimashi maparen inyakba tebilemtsü khuret tulu ajurutsü tenzüka lir.