Dolly Parton-i MusiCares Person of the Year award agizüktsü

Luchii/December 21 (Agencies): Nüngtugu country kentener, Dolly Parton-i 2019 MusiCares Person of the Year award agizüktsü, iba denji külemi la nem tetushi agutsüba kenten sentong agitsü.
Dolly Parton-i alizüng aika tongtetba aser mapang talangka charity mapa inyakba atema la nem tetushi agutsütsü, ta MuciCares-i metetdaktsü.
La nem tetushi agutsüba sentongji 61buba Grammy Awards agitsü anogo ana dang lia February 10, 2019 nü Los Angeles nung aliba Staples Center nung agitsü.
Iba sentong nung shilem agitsüpur rongnung Leon Bridges, Lauren Daigle, Vince Gill, Norah Jones, Shawn Mendes, Kacey Musgraves, Willie Nelson, Pink, Chris Stapleton, Mavis Staples, Mark Ronson aser Don Henley nunger densema lir.
Iba dak alia Katy Perry, Miley Cyrus, Garth Brooks aser Trisha Yearwood nungeria shilem agitsü. Iba kenten sentong tembanga Dolly Parton-ia shilem agitsü.
MusiCares nungi mezünguba award angur country artist ji Dolly Parton asütsü.
La indang Dollywood Foundation ajanga alima tesem ajaklen tanurtem nem kaket million 100 dak tema agutsüogo.
Iba kenten sentong nungi ajangzükba senji Recording Academy indang MusiCares charity senpong nung inoktsü; MusiCares-i music industry nung nisung 8600 nem US sen million 6.5 dak tema agutsüogo.