Dolly Parton-i tanurtem mozüki nem sen million $1 tenla agütsü

October 25, 2017 (Agencies): Arishi küm 71 tain kentener Dolly Parton-i tanurtem asoshi yangluba mezüngbuba kensep ‘I Believe In You’ ajungkettsü mechi Nashville nung aliba Vanderbilt University Children’s Hospital tawa semdang aser iba mapang lai iba mozüki nem tenla sen million $1 agütsü.
Iba tenla ya lar kinunger Hannah, la tenu Rachel, Hannah tebu Richard aser la indang physician Dr. Naji Abumrad nungertem leukaemia tashidak agi shiranga aliba iba mozüki nung taneptsü ngutetba tepela agi agütsü.
“Ni tanurtem meimer. Ni lenmang ka mesüra ka nung tanurtem atema teyari mapa inyaka aru, kechiaser ni tanurtem kanga meimer. Nia tanurtem aika aliba kibong nungi lir,” ta Dolly-i BBC dang ashi.
Mozüki nem tenla agütsüba kisüng masü saka Dolly ya Imagination Library nung tekolak lir. Imagination Library ya tanurtem arishi küm abir azüngtsü asoshi kaket angati agütsüba telok ka lir.
Dolly-i atenba ‘Jolene’, ‘Hard Candy Christmas” aser ‘I Will Always Love You’ ken tem kanga nüngtugu lir aser la ya Tennessee nung soa intet. La ya Avie Lee Caroline aser Robert Lee Parton Sr na tanur 12 rongnungi pezübuba lir.
Dolly ya senotsü nung kanga anünga intet aser lar tsüraburi senotsü nung shisa agütsüba ajanga la taküm melenshi, ta lai ashi.
“Oset aika nung sen indoktsü ya ni asoshi kanga tasak lir, kechiaser ni süputsü balala süpuaka kü indang tereprangtsü kasa dang alitsü. Ni sensaker kibong ka nungi intet anungji ni kicha züpa züpa magir, aser ni sen aika aazükatetaka ni kü indang sen azüngba dangbo kü indang temoatsü tekeraba aser timba züngdanger. Ni store-i oaka oset ka atema sen aika agütsütsü ya kü atema tasak lir. Tajungsang Tsüngrem! Iba atema kütsü aser kobu natia kechi süla, ta ni ashitsü,” ta laisa shisem.