Domestic Workers atema welfare board tentettsü akhanger

June 14, 2019 nü International Domestic Workers Day amungdang Kohima nung kidang mapa inyaker kati postcard ka yokdang agiba noksa angur. 

Kohima, June 14 (TYO): Hokolbarnü Domestic Workers of Nagaland-i welfare board ka tentettsü aser Labour Department kübok register asütsü atema takhangba agütsüogo.
International Domestic Workers Day amungdang parnoki iba takhangba agütsü. Iba sentong ya Ferrando Domestic Workers Alliance (FDWA)-i Post India, Nagaland Postal Division den yaritepa ayongzük.
Iba sentong amungba tenüng nung domestic workers-i takhangba agütsüba indang post card campaign ka tenzük. Iba ya India President, Prime Minister, Union Labour Minister, Nagaland Governor aser Chief Minister nunger dangi yok.
Parnoki onük pezü akhangba nung Minimum Wages Act 1948 kübok minimum wages agütsütsüba, Domestic Workers atema Welfare Board tentettsü, social security agütsütsü aser Labour Department nung registration asüba lir.
“Kidang mapa inyaktsü atema ayurtem ya sensakertem lir aser aiben parnok senzüka yutsür aser züngdoker. Parnok ya azüngtsü-zülutsü junga memetetertem asür aser talisa tetsürtemi pei temeten memetet alir” ta Head Post Office, Kohima nung Assistant Superintendent Eyunthung Yanthan-i o ashi.
Hopta ka piyong maparen inyakdang kidang mapa inyakertemi parnok takümtem nem timtem ajurubatem indang osang prokshitsü imlar. Iba maparen ajanga kidang mapa inyakertem tali aittsü aser parnok külemi longjemer temeten atema raratettsü, ta paisa ashi.
“Nagaland Postal Division-i iba mapa nung shilem agiba ya maongka ka lir” ta Yanthan-isa shisem.
FDWA Kohima coordinator, Rev Sister Theresa Langhu-i ashiba agi “kidang mapa inyakertem ya teküpokba jenjang nung ayur, senotsü shitak magütsür aser timi merepranger”.
Parnoki ola madoki timtemer anungji asenoki parnok posema nungittsüla aser temeten den jenjang yanglutsütsüla, ta Sister Theresa-isa ashi.
Kohima nung domestic workers 680 lir ta jangjaogo aser parnok rongnung nisung 350-i FDWA nung tenüng züluoka lir, ta laisa shisem.