Dominic-i Djokovic tsükdaktsü; Nadal, Halep semi final tongogo

Paris, June 7 (Agencies): Bodhbarnü French open quarter-final nung Defending champion Novak Djokovic Dominic Thiem tsükdaktsüa asayamong nungi toguogo.
Thiem-i straight set nung Djokovic koka semifinal-i iogo. Pa taruba asaya French 9ben koker alisang Nadal den asayatsü.
Thiem-i 7-6, 6-3, 6-0 agi Djokovic madak takok ngua liasü. Djokovic atema küm 7buba nung tang ya iba asayamong nungi takaratiba togur asütsü.
“Roland Garros nung Novak den tanaben asayaa koker semifinal-i aiba ya pungmang ka lir,” ta Thiem-i ashi. 2016 küm kasa asayamong semi-final nung Djokovic-i pa straight sets nung koka liasü. Tena tsüngda trokben asayaba nung Thiem-i tanga ya mezüngbuba akoker.
Kasa asayamong nung Pablo Carreno Busta yiruba sülen Rafael Nadal French Open semi-finals nung 10ben buba asayatsü asoshi maongka nguogo. Iba asaya Nadal-i 6-2, 2-0 agi kokya liasü.
Asaya tenzüker minute 51buba nung Pablo Carreno Busta tepok nung timtem adokba ajanga masayateti anenadok.
Iba takok ajanga Nadal-i clay nung 102 ben asayaba nungi 100 ben kokogo.
Maneni Mongolbarnü tetsürtem quarter-final asaya nung Simona Halep-i Elina Svitolina madak takok ngua semifinal tongtetogo.
Lai Elina Svitolina madak 3-6 7-6(6) 6-0 agi takok ngua liasü. Halep semifinal nung second-seeded Czech Karolina Pliskova den asayatsü.
French Open tarep temeyoktep asaya nung India nung asayar Rohan Bopanna final tongtetogo aser iba takok ajanga pa India nunger rongnungi grand slam akoker pezübuba asütsü asoshi maongka ajangtetogo.
Bopanna aser pa partner Canada tsür Gabriela Dabrowski nati Andrea Hlavackova aser Edouard Roger-Vasselin madak 7-5 6-3 agi takok ngua final tongtetogo.
Iba final ya Bopanna atema grand slam nung tanabuba final asütsü. 2010 küm US open tebur tarep asaya nung pa indang Pakistan nunger partner Aisam-ul-haq-Qureshi den final tongteta liasü.
Bopanna aser Gabriela Dabrowski na final nung Anna-Lena Groenefeld aser Robert Farah na den asayatsü.