Dominica: Yipru lendong nung nisung 20 shi asü

Santo Domingo, August 29 (Agencies): Carribbean Sea nung densemba Dominica asetkong nung Erika ta ajaba yipru lendong tesashi atalokba ajanga tanü tashi nung ishiba agi nisung 20 shi asüba osang bushitetogo.
Erika yipru lendong yashi Hokolbar nü atalokba sülen nütsüng yongsük 75,000 shi aliba aser alimang tasazük square kilometer 751 Dominica asetkong nung tebang agi meshitettsüsa teraksa bener arutsüba osang bushiteta lir.
“Tan Erika yipru lendong atalokba sülen ozü asektong nung terenlok alitsüren küm 20 agi tesülen jenjangi bener otsüogo,” ta Dominican Republic Ato Kilonser, Roosevelt Skerrit-i tanü metetdaktsü.
“Ni ozü asetkong semdanga senzüba sülen nisung aliba ki, apu aser lenmang timbaka raksar aliba tenük kuli nguogo. Aji oda, ozü Dominica asetkong tanaben tasen küma yanglushitsüsa jenjang tamajung ajurua lir,” ta pai shisem.
Erika yipru mupongi Dominican Republic linük nung yashi tzünglua kanga sashia bener arutsüba sülen yipru mupong tashiji tajemba küma Haiti tsütsüleni aoba osang jangjaogo.
Haiti linüki emergency jenokdak balala tenteta par linük ajunga nung yipru mupong lendong ajurutsü terenemshiba agiba osanga jangjaogo.
Erika yipru mupong tesashi ya Cuba ajangdanga aonba sülen United States southeast tsütsü, Florida yimti nung taruba Hombar nü tashi nung aontsü ta tsüngsang mupong ketdangsertemi metetdaktsüogo.
Florida Governor, Rick Scott-ia par yimti ajunga nung terenemshiba agitsü asoshi osang sangoktsüba sülen yimti nung alirtemi tang chiyongtsü aser tajemtsü tzü renema terenemshiba agiba osang jangjaogo.
Ano külen, Pacific tzüyim tsütsülena Hurricane Ignacio ta ajaba yipru mupong lendong taruba Hombar nü Hawaii asetkong nung ataloktsü osang bushiteta lir.