Don Bosco College Kohima 2buba Graduation Day agiogo

Kohima, Chiteni/July 12 (TYO): Hokolbarnü Kohima nung Don Bosco College Kohima (DBCK)-i Don Bosco Higher Secondary School (DBHSS) indang auditorium hall nung tanabuba Graduation day agiogo, ta ketdangsertem osang ka ajanga metetdaktsü.
Taküm 2016 batch nungi kaketshir 122 graduate süogo; parnok rongnung general students 22, education 11, English 32, History 15, Political Science 25 aser Sociology 17 densema lir.
Iba sentong nung tetushi tejaoker Vice Provincial Salesian Province Dimapur, Fr. Lakra Nazarius-i DBCK-i inyaka aruba mapatem atema tenüngsang agütsü.
Graduate students nem tenüngsang agüja pai, tarutsü nung maongka balala tajungtiba nung agitsü aser pei dak tashi aliba aser tashimaitbatem jangjatsü ajungshi.
“Nenok tarutsü tiaji ajungtsüla,” ta pai ashi.
Paisa kaketshirtem dang, taküm nung nükjidong ataloktsü atema maneni meranga inyaktsüla, ta ashi. “Nai taküm nung ajangzüknüba jenjang alangzüktsü atema meranga inyaktsüla,” ta pai ashi.
Fr. Nazarius-isa kaketshirtem dang yimya tamajung ajak indoktsü aser taküm anema alitsüsa libalirotsü ajungshi.
Pai lokti dang, linük 132 tashi nung Don Bosco indang shisaliok rejutem lir, ta ashiba den külemi kaketshirtem dang Don Bosco indang tangatetba tajungtem benshitsü aser alima ya tesem tajungba ka kümdaktsütsü ajungshi.
DBCK Principal, Fr. Dr. P. Suresh-i, Don Bosco nung azüngertem atema tetezü kanga keta mongtetba anogoji graduation anogo ya lir, ta ashi.
Paisa, “Nenok ya mezüngpurtem lir. Tanü graduation sentong ya atangji DBCK atema temoatsü tulu ka lir,” ta ashi.
Küm piyong kaketshirtemi inyakteta arubatem ajanga college-i nüma atanger, ta paisa ashi.
Principal-i, “Nenok ajak peipei lenmang nung tajung akümtsü ta ni amanger. DBCK atema ambassador tajung kaka süang aser nenok shisatsü aser maparen balala ajanga onok nüma tangdakjang,” ta ayongzük.
Sentong tetenzüklen DBHSS Principal, Fr. T.P James-i lokti pelaa agizükba o jembi aser Mhasivinuo o Neiphrenuo (2019 graduates) nati ken ka aten.
Iba sentong ya Vilaneinuo Agnes Tsiekha aser Thungashan Ngullie na leniba nung agi, Watisangla Ao-i graduate asürtem tenüng nung jembi aser DBCK assistant professor, Shiirhonuo Tsiirho-i tepela anküp o jembia liasü.