Don Bosco Compassion Channel-i Chedema semdang

July 31, 2019 nü Chedema yimdak Don Bosco College Kohima nungi NSS Unit züngsemtem aser Chedema nung Primary school nung azünger tanurtem külemi tangokba noksa nung angur.

Kohima, July 31 (TYO): Don Bosco College Kohima NSS unit-i Dr. Kiyasetuo Stephen Vizo leniba nung “Compassion Channel” tenzükogo aser iba ya NSS volunteers tazüngba mapang nung sen-a aazüktsü aser NSS-i adopt asüba yim, Chedema yaritsü atema maongka agütsütsüü asoshi lir, ta ketdangsertem osang ka ajanga metetdaktsü.
Compassion Channel kübok inyaktsü atema telok pongu nung züngsem 16 lir, aser telok ajak jagi lenmang balala ajanga sen aazüktsü atema kaket züluba, lottery, cake yangluba, süoshi aser naro ayokba mapatem inyaka liasü.
July 31 nü Compassion Channel nung züngsemtemi senotsü tajangzük anguba nungi Chedema yimdak primary school ana nungi tanurtem yaria kakettem, stationeries, tzü filters aser süoshi agütsü. Item maparen ya DBCK, NSS president, Elivi Swu aser Chedema Village Students’ Union (CVSU) president Menubeilie Penyü, CVSU general secretary Rokosevituo aser CVSU games & sports secretary Keyhoviu nunger lenisüba nung inyak.
Iba dak alia Kevisezo-i Compassion Channel indang metetdaktsü aser Hutweateung-i merükmejuba onük ajembia liasü.
Primary schools nung staff tem Kelezhatuo aser Kezhakhonuo nati NSS volunteers-i kaketshirtem atema temeim mapa inyakba asoshi parnok dang pelaba lemsatep.
Iba sentong ya Petekhrienuo leniba nung agi aser Niki Kath-i anküp o jembia sentong tembanga liasü.