Don Bosco Kohima hon jubileemung January 31 nungi tenzüktsü

Kohima, Aenjeti/January 28 (TYO): Don Bosco Kohima küm tepiyong Hon jubileemung ya “Towards a better world with Don Bosco” omen nung ajemdaker January 31 nungi tenzüktsü.

Don Bosco Kohima ya 1971 küm tentet. 1975 nungi 2020 tashinung iba kaket reju nungi kaketshir 3588 tashi HSLC ajangtetogo. Maneni iba reju nung 1997 nungi 2020 tsüngta kaketshir 1141 HSSLC (Science) ajangtetogo aser 2011 nungi 2020 tsüngta HSSLC (Arts) azünger  aketshir 858 ajangtetogo.

Tang Don Bosco Kohima nung nursery nungi higher secondary tashinung Don Bosco College densema kaketshir 2200 lir. Bodhbarnü Kohima nung osangbener den jembiba mapang Don Bosco Kohima Jubilee Organizing Committee mendenpuba, KD Vizo-i ashiba agi, küm tepiyong iba benjongmung mungyonga aoba mapang music, art, literary aser danga sentongtem ayongzüktsü.

Küm tepiyong mungyonga aoba sentong ya November 2021 hopta tanabuba nung tembangtsü.

Küm 50 tashi shisaliok nung tematiba jenjang nung agüja aser tenzüka aruba mapang ibai taochi aser temoatsü benjongmung ka asütsü, ta Don Bosco Kohima nungi alumni, Vizo-i ashi.

Iba hon jubileemung takok ngua amungtsü atema organizing committee senden aiben mena arutagi, ta Vizo-i metetdaktsü.

Iba hon jubileemung tenzükba sentong ya Don Bosco Kohima nung January 31 nikongdang 4:00 ako nung alitsü. Iba sentong nung nisang asongba aser milen tsüklokba den golden jubilee sky lantern yoktsü aser jubilee nüngtem nung music/video album sayatsü.

January 31 nikongdang sentong nung KD Vizo-i tarur pela agizükba o jembitsü aser Fr. Innocent Panmei SDB, viceprincipal, Don Bosco Higher Secondary School ajanga Don Bosco otsü tongmelang agi lemsateptsü.

Dr. Zavei Hiese (1st Batch) aser Fr. Kuriakose SDB nati “Reminiscing the past” atema mapang agitsü aser Fr. P. Suresh SDB, Rector & Principal Don Bosco College aser Fr. T.P. James SDB, Principal, Don Bosco Kohima nati salem o lemsateptsü.

Iba sentong nung Mmhonlumo Kikon, Advisor IT & C, Science & Technology & NRE ajanga o jembitsü.

Maneni Vitsu Peter Yhome, general secretary, Don Bosco Kohima Jubilee Organizing Committee ajanga tepela ankep o jembir iba sentong tembangtsü.

Iba sentong nung adentsü asoshi taoba mapang Don Bosco Kohima nung azünger ajak pelashishia jaoker, ta sangdong ka ajanga ashi.