Donald Trump-i Chicago election nüboyimtsü sentong thinentsüsa aküm

Republican yimtenren telok nungi US Tir menden atema candidate ka ama toktepsang, Donald Trump-i Illinois state kübok Chicago yimti nung ayongba election nüboyimtsü sentong thinentsüsa akümba osang sangoktsüba sülen Trump anemertem pelatepba noksa nung angur. (Chicago, March 12)

Chicago, March 12 (Agencies): Republican yimtenren telok nungi US Tir menden atema candidate ama toktepsang, Donald Trump-i Illinois state kübok Chicago yimti nung ayongba election nüboyimtsü sentong thinentsüsa akümba osang jangjaogo.
Trump anemer nisung meyirijang jenti nüboyimtsü sentong agidak tonga Trump pusemer den raratepba ajanga yasüng, Hokolbar aonung agitsü ayongba election nüboyimtsü sentongji tembanga magiteti kasaji thinentsüsa aküm ta Trump ketdangsertemi osang jangjashitsü.
“Yasüng Chicago kübok University of Illinois sentong nung Trump-i onük jembiba jakdang pa pusemer aser anmertem na tsüngda rarateptsü tenzükba yong iba sentongji tembanga magitetsüsa aküm,” ta parnoki ashi.
Tesülen, election nüboyimtsü sentong thinentsü lemtetba osang metetdaktsüba den külemi, sentong nung adener ajungai yimjung nung pei talikdaki meyipa aotsü asoshi Trump-i ajungshia liasü.
Yasüng Trump pusemer aser pa anemer na tsüngda rarateptsü tenzükdang police ketdangsertemi raratepertem mapang shitak nung nokdangadokba yong yasüng nisung yiruba mesüra asüba lendong matalokba den külemi, police-ia rarateper nisung ka danga aputsüsa tia majuruba osang jangjaogo.
“Trump anemertemi election nüboyimtsü sentongji anentsütsü nükjidong nung yasüng lendongji atalokdaktsü,” ta Trump pusemertemi metetdaktsüogo.
Ajisüaka, Trump-i taoba mapang ayongba nüboyimtsü sentongtem nunga tan amala lendong ajuruba osang bushitetba den külemi, pa anemertem tashiyim agi meindoktsü asoshi Trump-i melaba osang jangjaogo.
Missouri kübok St. Louis nung tentetba Peabody Opera House nunga Trump pusemer aser pa anemertem na tsüngda yasüng, Hokolbar aonungsa raratepba osang angazükogo.
Trump-i election nüboyimtsü sentong balala nung Mexico, Muslim aser pei linük toktsür US nung jenoka alirtem sensatsüba osangtema bushiteta lir.