Donald Trump-i India mesemdangtettsü

New Delhi, Mongputeni (October) 28 (Agencies): Sangküm Republic Day parade nung adentsü atema India-i US President Donald Trump jaok saka pai ibaji magizük, ta osang ka ajanga metetdaktsü.
Tawa tu US ketdangsertemi NSA Ajit Doval dangi shidi ka nung Trump-i magizükba osang metetdaktsü.
Iba mapangji State of the Union address den linük dak sendakba mapa kar nung mazüngtsü aser iba jagi pai India-i jaokba magizüker aser iba atema sasar ta Trump-i züluba shidi nung shia lir.
Taküm April ita India-i US president Republic Day nung adentsü jaokba shidi yok. Iba sülen August ita White House press secretary Sarah Sanders-i shidiji nguogo ta ashi saka September nung 2+2 dialogue agiba sülen ang iba atema telemtetba ka agitsü ta laisa metetdaktsü.
India-i Russia nung defence lijaliyongba aser Iran nungi totzü alizükba atema tawa India aser United States tsüngda tesentaktep mejungi küma lir.
Russia indang defence aser intelligence sector den shishilembaba linüktem Countering America’s Adversaries Through Sanctions Act (CAATSA) kübok automatic sanctions agütsütsü ta United State-i metetdaktsüogo.
Iba amaji amokmerenaka India-i Russia dang nungi S-400 surface to air missile systems alizük.
Trump’er sorkari parnok den yaritepba linüktem dang November 4 tashi nung Iran dang nungi totzü alizükba anentsü tetuyuba agüja lir, saka India-i Iran nungi maneni totzü alir.
“US-i India lemtetba tenük yoka reprangdar” ta US State Department otongdar Heather Nauert-i ashi.