Donald Trump-i jembiba oji onoki magizüker: Pakistan

Islamabad, August 25 (Agencies): Kiralongra dak sendakba nung United State Tir, Donald Trump-i Pakistan aitsübaji onoki khenyongi magizüker, ta Hokolbarnü Pakistan-i metetdaktsü.
Brihostibarnü Ato Kelonser, Shahid Khaqan Abbasi leniba kübok yimtenren lenirtem aser mitkar ketdangsertem temaba jenjang nung senden ka mena liasü, aser US Tir Trump-i Afghanistan aser South Asia dak sendakba nung kiralongra mapa nung Pakistan densema lir ta aitsübaji Pakistan-i magizüker, ta bangjema liasü.
“Afghanistan ya Pakistan atema dang masü saka region aser alima linüktem atema amokmeren tayongzükba tulu ka lir. Afghanistan nung yimjung atema alima linüktemi meranga inyakba nung Pakistan-ia nungita arur,” ta Pakistan lenirtemisa metetdaktsü.
Afghanistan-i ajangshiba tayongzükbatem atema inyaktsü jembiba aser Pakistan-i kiralongraratem jenokdaktsüba aser pusemba atema Pakistan dang tekümdangtsü o Trump-i jembia liasü.
Hombar aonung Trump-i, “Kiralongra anema raratsü atema onoki (US) Pakistan nem US sen billion aika agütsür, ajisüaka kasa mapang nung onoki raratem nem parnoki tejenokdak ki agütsür,” ta jembia liasü.
Trump-i Pakistan dang, nenoki kiralongrartem nem tejenokdak agütsüra timtem ajurutsü, ta tekümdangtsü metetdaktsü.
Osang angazükba agi, Pakistan Interior Minister, Ahsan Iqbal, Foreign Minister, Khawaja Asif, Chairman Joint Chief of Staff Committee, Zubair Hayat, Army tongti, General Qamar Javed Bajwa, Air Chief Marshal Sohail Aman aser Naval tongti, Admiral Muhammad Zakaullah nungera iba senden nungji aden. Iba sendenji ghonda pezü tashi mena liasü.
Iba senden nung bangjembaji Foreign Minister, Khawaja Asif-i sangdong.
US Tir-isa India danga rara aliba linük, Afghanistan nung yimjung atema shilem agitsü mepishia liasü.