Donald Trump-i tanü ‘travel ban’ tasen ka sangdongtsü

Washington, March 5 (Agencies) : US President Donald Trump-i ‘travel ban’ tasen yanglushiba ka metetdaktsütsü akok, ta US media ajanga metetdaktsü.
Ita ka tejaklen Trump-i linük kar nungi sensotem United States-i marudaktsütsü atema tenokdangba ka agütsüba ajanga US tesem balala nung ashishitep ken o ka adok aser tayimtsü anendak petsaprongtep.
Department of Homeland Security nung President Trump-i asüng ‘executive order’ tasenba nung sign asütsü ta sorkar tongti ketdangser kari ashi.
Trump-i January 27 nü sangdongba tetuyubaji Muslim nunger nokdangba ama nisungtemi ashishitep. Public dang jelia memetetdaktsü mesüra iba mapa inyaktsü atema agency tem dang osang magütsüi, kanga dang ajungbena tenokdangba agütsüba atema nisung aikati Trump aitsür.
Muslim nunger teimba sür aliba linük tenet nungi sensotem, anogo 90 nü atema United States-i aruba nokdangtsü. Iba den külemi anogo 120 atema refugee tem US-i marudaktsütsü aser Syria nungi refugee tembo khenyongi marudaktsütsü nokdanger ta Trump-i tetuyuba agütsüba sülen United States nung nisung aikati ola adok.
Iba tenokdangba ajanga anogo ishika US airport tem nung nisungtem sota ayu aser parnok karbo pei pei linüki meyipa yok.
Ajisüaka, Seattle nung US district judge kati aser ano San Francisco nung Ninth Circuit Court of Appeals nati tenokdangba sota ayuba ajanga Trump-i tetuyuba agütsüba ama mapa meinyaktet.