Donald Trump-i US Tir 45 buba inyaktsü

New York, November 09 (Agencies): Donald Trump-i America aser alima süngmangdakja Hillary Clinton madak takok tulu nguteta United States nung 45 buba Tir inyaktsü.
Republican candidate, Donald Trump-i Democratic candidate, Hillary Clinton madak takok anguba osang ajanga global markets nung tetsükdaktsü ajuru aser alima yimten yimsüsüba menden nunga tarendakba ka adokogo.
“America nung telemsa adoka aliba longjemtsü asoshi tang mapang tongogo,” ta Bodbarnep Donald Trump-i pa pusemertem dang ashi.
“Ni asen linük nung senso shia dang ni America nunger ajak atema Tir ama inyaktsü ta nangzüker” ta paisa shisem.
“Hillary-i mapang talangka kanga dang meranga inyakogo aser lai asen linük tenzükba atema, asenok la dang sentsüh lir” ta Donald-isa metetdaktsü.
Hillary Clinton-ia Trump nem takok anguba asoshi tepela lemsatepogo aser pa den külemi inyaktsü mulunga lir, ta metetdaktsü.
Tanü Hillary-i la pusemertem den ajurutepa jembidang, Trump ji America nunger ajak atema takok anguba tir ka asütsü imlar, ta ashi.
“Asenoki bilemba dang nungibo, asen linük nung telemsa ulura adoka lir ta asenoki nguogo” ta laisa shisem.
US tir Barack Obami-ia tanep phone ajanga Trump den tepela osang lemsatep aser paisa osangbener dang ashiba agi, Trump tena tsüngda onük aika nung meputep liasü.
“Tatem nungbo asenok ajak telok ka nung tembanger. Asenok mezüng Amereica nunger, linük meimertem lir aser asenoki asen linük atema tajngtiba aginür” ta Obama-isa metetdaktsü.
Küm ana tashi Tir menden atema nüboyimtempa arudang, Republicans aser Democrats tsüngda kanga sashia aitsütepa aser toktepyonga aru. Arishi küm 70 tain Donald Trump-i ozüng alema arurtem meindoktsü, linük nung Muslim nunger nokdangtsü aser angati shishilembatsü tenangzüktep agia alibatem agientsü ta jembiba ajanga America nung democratic tangatetba nung inyaksangshiba nung tebilemtsü adokdaktsü.
Brihostibarnü Donald Trump-i White House nung Tir Barack Obama den mezüngbuba transition meeting amentsü.
US nung Tir 45 buba inyaktsü takok anguba sülen Russia Tir, Vladimir Putin-i Trump nem tepela osang lemsatep aser US-Russia tesentaktep tajungba akümtsü atema mapa inyaktsü ayongzük.
Ano, EU lennirtem- Donald Tusk aser Jean-Claude Juncker natia Trump tekaratiba nung EU-US summit nung adentsü atema jaokogo.