Donald Trump nem vote magütsütsüla: Adele

Washington (United States), October 26, 2016: US Tir election agitsü hopta ana shi dang anünga lia nüngtugu kentener, Adele-i US Tir election nung shilem agitsü tenzüka Florida nung la kenten sentong ka nung lai la sapurtem dang, Donald Trump nem vote tagütsü saka Hillary Clinton nem agüjang, ta mepishi.
Mongolbarnü (October 25) American Airlines Arena, Miami nung lai Democratic candidate, Hillary pusemtsü nangzükba den külemi la sapurtem dang mangatettep ken o alisang Republican candidate Trump nem vote tagütsü, ta ashi.
“Ni kechi inyaktsüar ni meteta lir – pa nem vote tagütsü, ni ashitsü ajak agi ibaji dang,” ta lai kenten sentong nung adenertem dang ashi, aser iba video ji NBC’s Adam Kuperstein-i online ajanga lemsatepogo.
“Ni kü ajak agi (100%) Hillary Clinton pusemer. Au ni pusemer. Aser pa nem vote agtsütsü tebilemba alirtem dang (ya ashir), ni ibaji mesükshir, nenok atema tajung, ne mulungba inyakang. Nibo shiba nem vote agütsütsüar ibaji lemsateper dang,” ta nüngtugu kentenerisa ashi.
Tan ita o toktepba asemprong nung Clinton-i tajungba shilem agir ama bilemer, aser la arishi küm 69 ajungtsü jelia lai Adele kenten sentong nung aden.
Osang ajanga angazükba agi Adele-i, November 8 nü elections nung vote agütsütsü la dang memelar aser iba dak sentakba nung lai, “Ni England nunger lir, ajisüaka America nung kechi atalokdir iba jagi ni konghsir. Ni la [Clinton] meimer. La ya tesüngmangtsü ka lir,” ta ashi.