Donald Trump TIME indang ‘Person of the Year’ runner up shim

Washington, December 07 (Agencies): United States indang tir 45buba, Donald Trump ya TIME indang ‘Person of the Year’ runner up shim. Anogo eshika tejaklen Trump-i Twitter nung, iba magazine ajanga pa nem ‘Person of the Year’ konang ya agütsütsü asüngdang, saka pai magizük, ta zülutsüba sülen iba osang ya sangdong. TIME magazine ajanga Trump-i ashiba ya tiazü lir, ta sangdonga lir.
Trump ya tanabuba jenjang nung inoktsü asoshi telemtetba agiba indang osang metetdaktsüba mapang TIME ajanga parnok indang official website nung, “Trump indang candidacy ajanga yimden yimsüsüba tsütsü yimya zülushiogo. Tang pai tir indang yimya melenshitsüogo,” ta zülutsü.
“Pai pa ‘social debates’ nung inok – National Football League nung longkak aitba, Confederation nüngshilong atema mangatettep adokba – aser ajungbena item ajunga ya sobaliba tsütsüi melentsü,” ta parnoki zülusemtsü.
Taküm balaka TIME ajanga tetsür aser teburtem shirnoki tetsürtem tim mesüi amshiba indang jembia aru, parnok tushia ‘The Silence Breaker’ tenüng agütsü aser Twitter nung iba indang tetezü balaka yur jembiba manenteter.
Ibai kechiba süra, 2016 nungi tenzüka tetsür aika yimjaki arua Donald Trump-i tetsürtem dak tim mesüi amshiba indang jembi, saka pai kicha tai meinyak aser item tetsür ajunga ya tiazü jembirtem lir, ta Trump-i ashi.
Saka Trump-i anchor Billy Bush den sensaksemba ya 2005 “Access Hollywood” ajanga bushiteta shishilembar mongin, Trump-i tetsür atema melungsentsü tamajung aliba jungkai adoktsü.
Donald Trump nem iba maongka agütsüba asoshi nisung aikati mepelar aser aikati pa tenüng amshiba asoshia mepelai asüngdanger.
Taoba küm TIME ajanga Trump ya Person of the Year nüngja agütsü aser iba ajanga mangatettep aika adoka liasü.