DONER Secy.-i Chuchuyimlang nung Gandhi Ashram semdang

Secretary DONER-i MGAHD Mokokchung nung kaketshirtem den jembiba angur.

Mokokchung, Luroi/August 13 (TYO): Secretary, Ministry of DONER, Government of India, Naveen Verma, IAS-i Nagaland Gandhi Ashram aser item rejutem- Mahatma Gandhi Academy of Human Development (MGAHD) aser National Institute of E- Learning & Information Technology (NIELIT) semdangogo, ta ketdangsertem osang ka ajanga metetdaktsü.
NIELIT nung Secretary-i smart classroom semzüktsü, kong sayutsü aser angazüktsü atema electronic facilities lir; iba sülen pai kaketshirtem den jembia liasü. Iba sentongji Joint Director, Daniel Meren leniba nung agi.
O lemtepba mapang Verma-i kaketshirtem dang kanga nendaka angazüktsü aser pei nükjidong tejangja ayutsü ayongzük.
Paisa tang teyangludak administrative aser hostel buildings semdang aser Ashram amenoktsü atema Chuchuyimlang yimi tenlaba ali acre 332 semdanga liasü.
Mahatma Gandhi Academy of Human Development ya TATA Institute of Social Science aser National Gandhi Ashram mapatong ka lir, aser HANs Foundation-i sponsor asür. Mahatma Gandhi Academy of Human Development nung pai kaketshirtem aser tesayurtem den jembia liasü, aser iba mapang nung pai, nisung ajaki pei taküm alitsü atema dang masü saka lokti ajangzükdaktsütsü atema-a nükjidong ayutsüla, ta ashi.
Paisa Northeast state tem terenlok atema sorkar programmes aser schemes balala metetdaktsü.
Chuchuyimlang yimdak nüburtemi Naveen Verma agizükba sentong ka ayongzüka liasü, aser iba sentongji Anumai Amphitheatre nung agi.
Iba sentong nung jembidang pai Ashram aser terenlok atema yimertemi ali tulu tenlaba atema pelaba lemsatepba den külemi Northeast tesem nung terenlok mapa inyaktsütsü atema DONER-i mapatong benoka inyakba metetdaktsü.
Kasa sentong nung Mokokchung Deputy Commissioner, Sachin Jaiswal aser Founder Nagaland Gandhi Ashram, Chuchuyimlang, Natwar Thakkar natia jembi.
Onük jembidang Mokokchung DC-i Naveen Verma pelaa agizükba den külemi pai Ashram atema bilemja semdangba atema pa dang pelaba metetdaktsü.
Iba dak sendakba nung DC-i nüburtem danga DONER indang mapatong metettsü aser iba nungjagi tajangzük agitsü ajungshi.
1955 küm Nagaland Gandhi Ashram Chuchuyimlang tentetsang, Natwar Takkar-i akhidang iba Ashram tenzükba indang bilemteta jembi.
Iba sentong ya Chuchuyimlang Baptist Arogo, Limabai sarasadema tenzük aser Chairman (CVC), Sanen Pongen-i lokti pelaa agizükba o jembia liasü. Kasa sentong nung sobaliba ken, sobaliba sentongtem aser osangtajung ken tena liasü. Iba sentong ya MSW student, MGAHD, Temsusenla leniba nung agi.
Tanep Naveen Verma-i Tuli nung Merangkong brand Tea yangluba ECHAHABA Tea factory-a semdanga liasü, aser iba mapang nung pai Co-operative Society nung süngu lu ayimertem aser Merangkong village council züngsemtem ajurua jembi.
Item sentongji ECHAHABA Tea Growers Co-operative Society, Merangkong Chairman, Dr. Aotoshi leniba nung agi aser Tuli nung tetsürtemi aou agi atakba exhibition-cum-demonstration sentonga ka ayongzüka agi.
Kasa sentong nung co-operative societies Registrar aser Nagaland Bamboo Development Agency ketdangsertema aden.