DoSE atema tebilemtsü ka ajurur: NGHSSEA-i lungkak aittsü

Dimapur, May 5 (TYO): Nagaland nung School Education Department asoshi ano tebilemtsü ka ajuruogo, aser ibaji May 10, 2017 nungi Higher Secondary cadre kübok ketdangsertemi shilem lemsar lungkak aittsü amokmerenba lir.
“Nagaland Government Higher Secondary School Employees Association (NGHSSEA)-i sorkar dang May 9 tashi nung onük pezü takhangba agütsüba mapa küma inyaktsü mapang latetja lir. Sorkari ibaji meinyakra NGHSSEA-i anogo asemnü atema mezüngbuba lungkak aitba shilem agitsü” ta tanü NGHSSEA president, Kelhikha Kenye-i osangbener dang ashi.
NGHSSEA-i sorkar nem takhangba agütsübatem rongnung, incumbency list benoktsü aser School Education Department nung ketdangsertem pay slips angutsü atema Accountant General dangi post continuation agütsütsü atema lir.
Department nung Secondary aser Higher Secondary officers tsüngda züngsemtem menden ajungketba inyakyim nung tetsükdaktsü aika ajurur. Anungji, department nung higher secondary section nung ketdangsertem indang seniority list adokjang, ta NGHSSEA-isa takhangba agütsüogo.
Parnokisa sorkar dang, mapa tazüng alibatem nung higher secondary ketdangsertem menden ajungketa mapa lemzüktsütsü takhangba agütsür.
Sorkari March 6, 2017 nü Government Higher Secondary School 23 nung principal tem ket nungi Drawing and Disbursing Officer (DDO) tashi agienba aser ibaji District Education Officers nem agütsüba meyipa reprangshimang, ta NGHSSEA-isa takhangba agütsüogo.
Tanü osangbener senden nung NGHSSEA ketdangsertem den külemi GHSS nung principal tem aser ketdangsertem aden.